Cristiano Ronaldo dhe partnerja e tij Georgina Rodríguez janë rikthyer sërish në qendër të vëmendjes në rrjetet sociale, këtë herë jo për një gol apo aktivitet sportiv, por për rezidencën e tyre luksoze në Portugali.
Çifti është rikthyer në shtëpinë e tyre në zonën ekskluzive Quinta da Marinha në Cascais, pas përfundimit të sezonit të Cristiano Ronaldos me Al Nassr, ku ai arriti të fitojë titullin e Saudi Pro League.
Ronaldo ndau në rrjetet sociale një foto familjare me mbishkrimin: “Të lumtur që jemi kthyer në shtëpi me familjen”, ndërsa Georgina publikoi një imazh me mbishkrimin: “Shtëpia në proces”.
Megjithatë, ajo që tërhoqi më shumë vëmendjen e publikut ishte madhësia dhe luksi i jashtëzakonshëm i vilës së tyre, e cila sipas mediave vlerësohet nga 25 deri në 35 milionë euro.
Rezidenca ndodhet në një truall prej 12,000 metrash katrorë dhe ka mbi 5,000 metra katrorë hapësirë të ndërtuar, të shpërndarë në tre kate. Ajo përfshin një suitë master prej 300 metrash katrorë, pishina të brendshme dhe të jashtme, fushë tenisi, kinema private, palestër, dhomë masazhi, kopshte të mëdha dhe garazh me kapacitet për rreth 20 automjete.
Pamjet e vilës janë bërë virale në rrjet, duke nxitur reagime të shumta nga përdoruesit e rrjeteve sociale, të cilët e kanë krahasuar atë me hotele apo qendra tregtare për shkak të përmasave të saj.
“Jam aq i varfër sa nuk e di nëse është hotel, qendër tregtare apo shtëpia e tij”, “Të duhet motor për të kaluar nga njëra anë e shtëpisë në tjetrën”, “Mendova: vetëm për ta pastruar atë shtëpi…” ishin disa nga komentet që qarkulluan në rrjet.
Rezidenca konsiderohet një nga më ekskluzivet në Portugali dhe është konceptuar si shtëpia e përhershme e çiftit, ku Ronaldo pritet të kalojë një pjesë të jetës pas përfundimit të karrierës sportive.
Ndërkohë, sulmuesi portugez 41-vjeçar po përgatitet për Kupën e Botës 2026, e cila mund të jetë turneu i tij i fundit madhor me kombëtaren.
Portugalia ndodhet në Grupin K dhe do të luajë ndeshjen e parë më 17 qershor kundër Republikës Demokratike të Kongos, më pas ndaj Uzbekistanit më 23 qershor dhe do ta mbyllë fazën e grupeve kundër Kolumbisë më 27 qershor.
