Ushtria amerikane tha se ka kryer një valë të re sulmesh ndaj Iranit, me synimin për t’ia dobësuar më tej aftësitë për të sulmuar anijet në Ngushticën e Hormuzit. Kjo ishte nata e dhjetë radhazi e operacioneve ushtarake, pasi presidenti Trump u zotua se do ta ndëshkojë Iranin për vrasjen e tre ushtarëve amerikanë në Jordani.
Në përgjigje të sulmeve të fundit, Irani goditi dy cisterna nafte në Ngushticën e Hormuzit, si dhe objekte ushtarake amerikane në Bahrejn e Kuvajt.
Presidenti iranian, Masoud Pezeshkian, tha se vendi i tij po zhvillon “luftë të plotë” me Shtetet e Bashkuara. Garda Revolucionare Islamike njoftoi se ka në shënjestër edhe infrastrukturën e kompanisë amerikane Amazon në Bahrejn.
Sipas mediave shtetërore iraniane, infrastruktura qendrore e të dhënave e kompanisë u godit dhe u shkatërrua me disa raketa lundruese.
Teherani konfirmoi po ashtu se pavarësisht dështimit të armëpushimit, mes palëve vazhdon shkëmbimi i mesazheve diplomatike, përmes ndërmjetësve.
Komanda Qendrore e SHBA-ve (CENTCOM) njoftoi në rrjetin X se sulmet e fundit kishin në shënjestër qendra të komandës ushtarake iraniane, kapacitete detare, pozicione për lëshimin e raketave e dronëve, si dhe sistemet e mbrojtjes ajrore.
Sipas CENTCOM-it, anijet tregtare kanë vazhduar të kalojnë përmes Ngushticës së Hormuzit.
