Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Po ndodh më në fund ajo që duhej të ndodhte prej vitesh: WhatsApp ka dalë në Apple Watch. Po, tani mund të lexosh, dëgjosh dhe madje të përgjigjesh pa nxjerrë më telefonin nga xhepi.
Aplikacioni i ri të lejon të lexosh mesazhet e plota (jo më ato tre rrjeshtat misteriozë që s’të thonë asgjë), të shohësh më shumë nga historiku i bisedave, të dërgosh reagime me emoji dhe madje edhe të regjistrosh e dërgosh voice messages direkt nga ora.
WhatsApp ka menduar edhe për ata që s’e kanë qejf të humbasin asnjë detaj vizual — tani mund të shohësh imazhe dhe stickers në rezolucion të lartë, tamam si në telefon.
E vetmja gjë që s’funksionon plotësisht është pjesa e telefonatave. Mund të shohësh kush po të telefonon, por s’mund të përgjigjesh nga vetë ora – të paktën ende jo.
Sidoqoftë, WhatsApp thotë se ky është vetëm fillimi, dhe në përditësimet e ardhshme do të sjellin më shumë funksione. Aplikacioni është i disponueshëm për të gjithë Apple Watch Seria 4 e lart që kanë watchOS 10.
