Kur bëhet fjalë për pasionin dhe dashurinë për skuadrën e zemrës, pak grupe rivalizojnë tifozët e sportit. Qoftë përmes udhëtimeve me makinë, turneve apo ngjarjeve ndërkombëtare, këta udhëtarë besnikë shpenzojnë shumë dhe vendet pritëse tani po i kushtojnë vëmendje. Sipas të dhënave të UN Tourism, turizmi sportiv përfaqëson rreth 10% të shpenzimeve globale në turizëm dhe pritet të rritet me 17.5% deri në vitin 2030. Vetëm në SHBA, kjo industri gjeneroi 114 miliardë dollarë në 2024, duke tërhequr mbi 100 milionë tifozë nëpër stadiume.
Sipas një studimi të Expedia Group, 44% e tifozëve udhëtojnë ndërkombëtarisht për ngjarje sportive, përqindje që rritet në 56% mes moshave 16–34 vjeç. Shpenzimet mesatare për një udhëtim kalojnë 1,500 dollarë për person.
SHBA po bëhet një qendër e madhe e sportit, me Lojërat Olimpike në Los Anxhelos në 2028 dhe Kupën e Botës FIFA në 2026. Qyteti po përmirëson infrastrukturën e transportit dhe zhvillon ngjarje si Super Bowl, US Women’s Open dhe ndeshje të mëdha të futbollit.
Las Vegasi, që më parë nuk kishte asnjë ekip sportiv profesionist, tashmë ka ekipe në NHL, NFL dhe së shpejti në MLB, si dhe organizon Çmimin e Madh të Formula 1 që solli 934 milionë dollarë në ekonomi në vitin 2024. Tifozët shpenzojnë mesatarisht 1,980 dollarë për udhëtim, shumë më tepër se turistët e zakonshëm.
Edhe Miami po investon fort, veçanërisht pas nënshkrimit me Lionel Messin. Po ndërton një park sportiv prej 131 hektarësh që pritet të sjellë 1 miliard dollarë ndikim ekonomik me organizimin e shtatë ndeshjeve të Kupës së Botës.
Spanja, ku mbi 60% e popullsisë identifikohen si tifozë të sportit, si shtet po e forcon rolin e tij si destinacion sportiv. Valencia ka investuar mbi 1.4 milionë euro në turizmin sportiv dhe do të presë Moto GP dhe Gay Games në 2026. Po ndërtohen edhe dy stadiume të mëdha: Roig Arena dhe Nou Mestalla.
Australia ka nisur fushatën “Dekada e Gjelbër & e Artë” për të promovuar ngjarjet sportive deri në Lojërat Olimpike të Brisbane në 2032. Ngjarjet përfshijnë Australian Open, F1 Grand Prix dhe ndeshje të rugby-t dhe kriketit. Melbourne do të presë edhe ndeshjen e parë zyrtare të NFL në Australi.
Afrika e Jugut, falë klimës së butë dhe historisë, po rritet si destinacion turistik sportiv. Me afro 400 fusha golfi dhe ngjarje të mëdha si Kupat Botërore në kriket e rugby, vendi pritet të gjenerojë 10 miliardë dollarë deri në 2034. Sipas zyrtarëve vendas, sporti në Afrikën e Jugut është më shumë sesa ekonomi, është një mjet për bashkim dhe transformim shoqëror.
