Gjykata e Tiranës la në burg edukatoren Majlinda Dehima, e akuzuar se dhunoi një 3-vjeçare në kopshtin privat ku punonte. E dyshuar për veprën penale “Keqtrajtimi i të miturit”, Dehima u arrestua më 9 nëntor, me urdhër të Prokurorisë së Tiranës.
48-vjeçarja u arrestua pas publikimit të pamjeve filmike tronditëse e që bënë xhiron e rrjeteve sociale. Në një video që tashmë po qarkullon gjerësisht, Dehima shihet teksa keqtrajton një vajzë të mitur, e cila ka thyer edhe këmbën. Masa nga prokuroria u kërkua pasi akuza mori në dorëzim pamjet filmike të kopshtit privat në kryeqytet. Në disa episode, dhuna ishte evidente.
Ngjarja e rëndë ka tronditur mbarë opinionin publik. Krahas reagimeve të shumta dënuese e të ashpra në rrjetet sociale pati edhe një protestë para Ministrisë së Arsimit, më 9 nëntor.
Qytetarë dhe aktivistë kërkuan më shumë kontroll dhe siguri për fëmijët në kopshte pasi rastet e dhunës mund të jenë të shumta. Mes protestuesve kishte nga ata që morën me vete fëmijët e vegjël. Në duar mbanin postera me mbishkrimin: “Stop dhunës!”.
Po në Tiranë, gjykata vendosi “Arrest shtëpie” për 30 vjeçaren që ditë më parë braktisi në bodrumin e një pallati në Yzberisht, foshnjën e porsalindur e që për fat të keq ndërroi jetë. Me kërkesë të avokatëve, asaj do t’i bëhet vlerësim i gjendjes psikologjike. Në dëshminë e dhënë, pretendoi se ishte ndjerë në presion pasi familjarët nuk e dinin për shtatzaninë dhe se partneri e kishte braktisur.
