Anija kozmike e Rusisë, Luna-25 u rrëzua sot në sipërfaqen e Hënës, pasi kishte humbur kontrollin. Lajmin e bën të ditur Agjencia ruse e Hapësirës, Roskosmos. Ky ishte i pari mision i Moskës në Hënë në 47 vitet e fundit, por duket se ka dështuar, duke mos shkuar sipas parashikimeve.
Anija kozmike pritej të zbarkonte në polin jugor të Hënës, por e pati të pamundur pasi hasi në probleme teksa po lëvizte në orbitë, para zbarkimit të planifikuar për ditën e nesërme.
Qëllimi ishte që të eksplorohej një pjesë e Hënës, për të cilën shkencëtarët mendojnë se mund të përmbajë ujë të ngrirë dhe gjithashtu elemente të çmuara.
Në një deklaratë të publikuar sot, agjencia Roskosmos theksoi se nga dje pasdite i ka humbur të gjitha kontaktet me anijen kozmike.
Mjeti lëvizi nëpër një orbitë të paparashikuar dhe u shua si pasojë e përplasjes në sipërfaqen e Hënës.
Një ditë më parë, anija kozmike përjetoi një “situatë të pazakontë” në momentin kur po përgatitej për të hyrë në orbitën e parazbarkimit, pra më përpara uljes në sipërfaqen hënore, më 21 gusht.
Sipas mediave ruse, zyrtarët e Hapësirës mbajtën një takim emergjent gjatë natës së 19-20 gushtit, në përpjekje për të shpëtuar misionin, por pa sukses.
Luna-25 hyri në orbitën hënore katër ditë më parë, më 16 gusht, duke u bërë anija e parë kozmike ruse që e bën këtë që nga Luna-24 në vitin 1976, në kohën e liderit sovjetik, Leonid Brezhnjev.
Rusia nuk e ka fshehur se synon që të ndërtojë një bazë në Hënë deri në vitin 2040. Po ashtu, shpresonte të bëhej vendi i parë që do të zbarkonte në polin jugor hënor. Misioni nisi si garë me Indinë, por jashtë rivalitetit nuk mbeten as Shtetet e Bashkuara dhe Kina, të cilat kanë programe të avancuara të eksplorimit të Hënës e që shënjestrojnë polin jugor.
Raketa ruse Soyuz 2.1, bashkë me Lunën-25, u nisën më 11 gusht nga një vend pranë Moskës. Luna-25 kishte madhësinë e një makine të vogël e duhej të operonte për një vit në polin jugor të Hënës.
