Teleskopi i ri diellor në Hawaii ka nxjerrë një seri imazhesh që shikojnë thellë në Diell, njollën e diellit dhe të ashtuquajturat “zona të heshtura”. Imazhet e Diellit, i cili është 149 milionë kilometra larg nesh, janë fotografuar dhe publikuar nga Fondacioni Kombëtar i Shkencës me teleskopin diellor Daniel K. Inouye.
I vendosur në Hawaii, observatori u ndërtua për të marrë fotografi super të qarta të Diellit dhe për të matur të gjithë aktivitetin e Diellit që ndikon në motin e hapësirës, duke përfshirë njollat e diellit, shpërthimet dhe nxjerrjet e masës koronale. Këto ngjarje mund të krijojnë probleme duke ndërprerë rrjetet elektrike dhe sistemet e telekomunikacionit në mbarë botën. Për shembull, një shpërthim diellor në mars 1989 rezultoi në një ndërprerje 12-orëshe të energjisë në të gjithë provincën e Quebec në Kanada.
Një vështrim i afërt i njollave të diellit zbulon fibra të gjata, të errëta dhe me ngjyra. Sipas Observatorit, shumica e njollave të diellit që shihen në imazh kanë madhësinë e Tokës dhe disa janë edhe më të mëdha. Njollat duken të errëta sepse janë më të ftohta se pjesët e tjera të sipërfaqes së Diellit dhe kur fushat magnetike vijnë në kontakt, ato shkaktojnë ndezje diellore. Disa nga imazhet tregojnë “ura drite” që duket se kalojnë nëpër njollat e diellit. Këto formacione mendohet të jenë fillimi i shpërbërjes së një njolle diellore. Shkencëtarët nuk e dinë ende se sa të thella janë këto struktura.
