“Trilleri” diplomatik mbi paqen në Ukrainë vazhdon me diskutime të përqendruara në garancitë e sigurisë, ndërsa Presidenti ukrainas Volodymyr Zelensky thotë se synon të sigurojë të paktën një miliard dollarë në baza mujore nga aleatët e tij.
Siç raporton Reuters, qëllimi, sipas tij, është që këto para të përdoren për të blerë armë amerikane, për përpjekjet e tij të luftës kundër Rusisë.
Presidenti ukrainas e bëri këtë deklaratë gjatë një takimi të përbashkët informues në Kiev me kryeministrin norvegjez Jonas Gaard Store, ku tha gjithashtu se Norvegjia mund të kontribuojë në garancitë e sigurisë për Ukrainën, në aspektin e mbrojtjes ajrore dhe sigurisë detare.
Paralelisht, presidenti ukrainas tha se planifikon të diskutojë me të dërguarin special të SHBA-së, Keith Kellogg, përgatitjet për një takim të mundshëm me presidentin rus Vladimir Putin.
Zyrtarët amerikanë dhe ukrainas pritet të takohen për këtë çështje, si dhe për garancitë e mundshme të sigurisë, më vonë këtë javë.
Ndërkaq, mediat shkruajnë se Presidenti amerikan Donald Trump deklaroi se ka folur përsëri me Vladimir Putinin, duke e përshkruar bisedën si “të mirë”: “Patëm një bisedë të mirë, të gjitha bisedat tona janë të mira.”
Trump gjithashtu akuzoi presidentin ukrainas Volodymyr Zelensky, duke e quajtur: “Një shitës i shkëlqyer: sa herë që largohej nga Shtëpia e Bardhë, merrte me vete miliona dollarë.”
Duke folur për ndihmën financiare amerikane, Trump theksoi: “Ne nuk shpenzojmë më asnjë para për Ukrainën. Ne merremi me NATO-n, jo me Ukrainën.”
