Nëse ju kujtohet episodi i serialit “Friends” ku Phoebe Buffay zemërohet me Ross pa e ditur pse, në natyrë ekziston një krijesë që nuk harron kurrë arsyen e zemërimit, madje as fytyrën e “armikut”.
Bëhet fjalë për korbin, një nga zogjtë më inteligjentë në botë, i cili shpesh është keqkuptuar për shkak të pamjes së tij dhe lidhjes me mite apo filma si “The Birds” i Alfred Hitchcock.
Në realitet, këta zogj kanë aftësi të jashtëzakonshme njohëse dhe një kujtesë mbresëlënëse.
Sipas një studimi nga University of Washington, sorrat janë në gjendje të mbajnë mend individët që i kanë kërcënuar deri në 17 vite. Eksperimenti, i udhëhequr nga profesori John Marzluff, tregoi se këta zogj jo vetëm që kujtojnë përvoja negative, por edhe i ndajnë ato me të tjerët.
Në studim, disa sorra u kapën përkohësisht nga një person që mbante një maskë të frikshme.
Në vitet që pasuan, kur studiuesit vishnin të njëjtën maskë, zogjtë reagonin me agresivitet, madje edhe ata që nuk kishin qenë të pranishëm në momentin fillestar. Kjo tregon se informacioni për “rrezikun” ishte përhapur në të gjithë komunitetin.
Kulmi i sulmeve u regjistrua disa vite më vonë, ndërsa reagime të tilla vazhduan për më shumë se një dekadë, duke dëshmuar një kujtesë afatgjatë të rrallë në botën e kafshëve.
Një detaj interesant ishte se një maskë tjetër, me fytyrën e Dick Cheney, nuk shkaktonte asnjë reagim negativ, duke provuar se sorrat dallojnë qartë midis kërcënimeve dhe situatave të padëmshme.
Përtej laboratorëve, raste të ngjashme janë raportuar edhe në jetën reale. Në një zonë të Dulwich në Londër, banorët janë përballur me sulme të vazhdueshme nga sorrat, të cilat besohet se mbrojnë foletë e tyre ose reagojnë ndaj përvojave të mëparshme.
Ajo që i bën këta zogj edhe më të veçantë është aftësia për të “edukuar” të tjerët. Kur një korb identifikon një rrezik, ai e transmeton këtë informacion te të tjerët, duke ndihmuar edhe brezat e rinj të shmangin kërcënimet.
Pra, nëse mendon se kafshët harrojnë lehtë, sorrat janë prova e kundërt: ato jo vetëm që kujtojnë, por edhe reagojnë… dhe ndonjëherë, nuk falin kurrë.
