Endometrioza mbetet një nga sëmundjet kronike më të dhimbshme dhe më pak të kuptuara te gratë dhe personat me mitër. Shumë paciente e përshkruajnë atë si një sulm të vazhdueshëm të brendshëm, që mund të shkaktojë dhimbje të forta pelvike, infertilitet dhe ndërprerje serioze të jetës së përditshme. Megjithatë, pavarësisht ndikimit të madh në shëndet dhe cilësinë e jetës, diagnoza e endometriozës shpesh vonon për vite të tëra ose nuk vendoset fare.
Sipas të dhënave rreth 10 për qind e personave me mitër gjatë viteve riprodhuese preken nga kjo gjendje, që përkthehet në rreth 190 milionë njerëz në mbarë botën. Endometrioza ndodh kur inde të ngjashme me shtresën e brendshme të mitrës fillojnë të rriten jashtë mitrës. Kjo mund të shkaktojë inflamacion, dhimbje intensive dhe në raste më të rënda, përhapje në organe të tjera si zorra apo fshikëza urinare. Pse diagnoza është kaq e vështirë? Edhe pse përdoren mjete si rezonanca magnetike (MRI), skaneri (CT) dhe ultratingulli diagnoza e endometriozës mbetet sfiduese. Arsyeja kryesore është se shumë mjekë nuk kanë trajnim të mjaftueshëm për të interpretuar saktë imazhet që lidhen me këtë sëmundje.
