Në Durrës, Fier dhe Vlorë janë 58 persona që shkelën ndalesën për të lëvizur me makinat private në kuadër të masave të Qeverisë për të kufizuar përhapjen e koronavirusit. Për nga numri i lartë kryeson Durrësi, me 32 shkelës, i ndjekur nga Fieri me 20 e Vlora me 6. Të gjithë drejtuesit që nuk kishin autorizim u shoqëruan në komisariate e pritet të sanksionohen. Prej orës 6 të mëngjesit e deri të djelën në mesnatë, në Tiranë, Durrës, Elbasan, Shkodër, Lezhë, Lushnje, Fier dhe Vlorë lejohet vetëm lëvizja e autoambulancave, makinave që kryejnë funksione shërbimi shtetëror, atyre që transportojnë mallra, si dhe automjeteve të autorizuara pasi kanë justifikuar arsyet e qarkullimit.
Kreu i Qarkullimit Rrugor, Erjon Ahmeti bëri të ditur sot se shërbimet policore gjenden në terren, të pranishme në çdo rrugë kryesore. Sipas tij, pjesa më e madhe e drejtuesve ka autorizim, ndërsa për një pjesë të vogël, që nuk rezulton të ketë patur urgjenca u bë shoqërimi dhe gjobitja. Në Tiranë janë 15 pika kontrolli.
Ndërsa në një masë të madhe, në vendin tonë po respektohet masa e ndalesës së automjeteve private, reagoi dhe kryeministri Rama.“Super start i kësaj dite të parë në mbrojtje të vetes, familjes dhe njëri-tjetrit në një luftë të paparë nervash, ku të vetmet armë që kemi janë mirëkuptimi, solidariteti dhe durimi, durimi, durimi”, – shkruan Rama në një postim në rrjetet sociale.
