Sipas një studimi të realizuar nga New York University dhe të publikuar në revistën The Independent, emri i një personi mund të ketë një ndikim të dukshëm në mundësitë e tij për karrierë dhe sukses. Kërkuesit zbuluan se emri ka rëndësi të madhe, pasi një në pesë persona pendohet për zgjedhjen e emrit të fëmijës.
Studiuesit theksojnë se emrat e shkurtër, të thjeshtë dhe të lehtë për t’u shqiptuar kanë më shumë mundësi për të arritur pozita të larta në karrierë. Përkundrazi, emrat e rrallë dhe të ndërlikuar mund të shkaktojnë vështirësi në procesin e punësimit, sipas një tjetër studimi të Universitetit Marquette.
Një tjetër element interesant është lidhja mes inicialeve të emrit dhe mbiemrit. Kërkuesit vërejtën se personat me mbiemra që fillojnë me shkronjat e para të alfabetit kanë përparësi në arritjen e rezultateve të larta akademike. Po ashtu, ata që kanë mbiemra që fillojnë me shkronjat e fundit të alfabetit mund të kenë tendencë për të bërë blerje pa kontroll.
Një studim i kryer nga revista “Psychological Science” thekson gjithashtu se individët me mbiemra që tingëllojnë fisnikë dhe të qartë kanë më shumë mundësi të arrijnë pozita drejtuese, duke përfituar nga perceptimi pozitiv i emrit të tyre.
