Macaulay Culkin, aktori i njohur amerikan që u bë i famshëm falë filmave klasikë të Krishtlindjes “Home Alone” nuk ka folur me të atin, Kit Culkin, prej më shumë se 30 vitesh. Marrëdhënia e tyre u prish përfundimisht që në fëmijërinë e aktorit, kur ai u bë yll i madh në Hollywood dhe sipas tij, u shfrytëzua nga babai me një orar të ngjeshur pune dhe me fitime të mëdha që shkonin kryesisht për familjen. Në një intervistë të fundit, Culkin tha se të shtatë fëmijët dhe katër nipërit e Kit nuk kanë kontakte me të, pasi ai ka qenë abuziv dhe i ashpër.
Aktori e ka cilësuar të atin si narcist dhe e ka pranuar se që në fëmijëri kishte ndier se nuk donte kurrë të bëhej një prind si ai. Sipas tij, Kit e kishte përjetuar me xhelozi suksesin e tij të menjëhershëm në audicione dhe role, gjë që e kishte bërë akoma më të ashpër ndaj tij. Culkin është shprehur disa herë se ka qenë viktimë e abuzimit fizik dhe mendor nga i ati, duke theksuar se kjo përvojë e hidhur e ka shtyrë të emancipojë ligjërisht veten prej tij në vitet ’90. Sot, me dy fëmijë nga Brenda Song, ai thotë se gjithmonë mundohet të jetë një baba i kujdesshëm dhe i dashur, krejt ndryshe nga përvoja që pati në fëmijëri.
Culkin ka sqaruar së fundmi disa prej thashethemeve më të famshme rreth filmit “Home Alone”, që e bëri të famshëm 35 vite më parë. Në një intervistë të rrallë për emisionin “Hot Ones” në YouTube, aktori foli për prapaskenat e filmit dhe momentet ikonike që kanë ngjallur diskutime për dekada. Culkin mohoi zërat se kishte improvizuar frazën e famshme “Ju dorëzoheni? Apo keni etje për më shumë?”, por tha se një tjetër moment, kur i thotë një punonjësi dyqani “Sepse je i huaj”, ishte plotësisht i improvizuar prej tij.
