Aktori legjendar, Anthony Hopkins, ka folur për herë të rrallë mbi marrëdhënien e ftohtë me vajzën e tij, Abigail Hopkins, me të cilën nuk ka pasur kontakt për më shumë se 24 vjet.
Në një intervistë për “The New York Times”, fituesi i çmimit “Oscar” u shpreh me qetësi dhe sinqeritet për këtë plagë familjare që, sipas tij, tashmë e ka lënë pas.
Sapo nuk mora përgjigje, thashë: në rregull, mirë. I uroj gjithë të mirat, por nuk do të ndahem shpirtërisht për këtë. Nëse dikush dëshiron të jetojë me hidhërim, është zgjedhja e tij
-tha aktori 87-vjeçar.
Ai shtoi se edhe përpjekjet e bashkëshortes së tij, Stella Arroyave, për të rikthyer komunikimin, kanë rezultuar pa sukses.
Hopkins, i njohur për rolet ikonike në filmat “The Silence of the Lambs” dhe “The Father”, pranoi se e ka pranuar ndarjen emocionale me vajzën si pjesë të jetës.
Duhet ta pranosh që jemi të papërsosur. Nuk jemi shenjtorë, jemi njerëz që bëjmë më të mirën që mundemi
-u shpreh ai.
Aktori shtoi se dikur kishte tentuar ta kontaktonte Abigail, por tani ndjen se duhet të ecë përpara:
Jeta është e dhimbshme. Njerëzit lëndohen, edhe ne lëndohemi, por nuk mund të jetosh në të kaluarën. Duhet të thuash: ‘Kaloje’. Unë bëra çfarë munda, dhe kaq.
Hopkins pritet të publikojë muajin e ardhshëm autobiografinë e tij të re me titull “Ne ia dolëm mbanë, fëmijë”.
I pyetur nëse shpreson që vajza e tij ta lexojë librin, aktori u përgjigj shkurt:
Nuk do t’i përgjigjem kësaj. Jo, nuk më intereson.
Ky rrëfim i sinqertë i Hopkins ka prekur shumë fansa, të cilët e kanë vlerësuar për forcën dhe maturinë me të cilën përballet me dhimbjet e jetës, duke treguar se edhe njerëzit më të suksesshëm përballen me plagë që nuk shërohen lehtë.
