Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Nëse mendove se raketa e re që sapo fluturoi me sukses ishte kulmi i ambicies, duket se historia sapo ka marrë kthesë tjetër. Blue Origin ka prezantuar një variant edhe më të madh të raketës së saj New Glenn, një version super-heavy që, për ta thënë thjesht, është më i gjatë se vetë Saturn V – rraketa ikonike që çoi njerëzit në Hënë. Në përmasa është thuajse në nivelin e Starship-it, kështu që gara për raketën më të madhe moderne sapo është ngushtuar.
Ky model i ri do të ketë në pjesën poshtë nëntë motorë dhe katër në pjesën lart. Rritja e fuqisë çon kapacitetin e mbajtjes së ngarkesës në mbi 70 ton në orbitën e ulët të Tokës, pak më poshtë se potenciali teorik i Starship-it.
Përveç shtimit të shtytjes, raketa e re do të ketë edhe një fairing shumë më të madh për të mbajtur ngarkesa më voluminoze. Ky kapacitet e vendos kompaninë në lojë për misione që kërkojnë transport masiv: mega-konstelacione satelitësh, misione drejt Hënës dhe hapësirës së thellë, si edhe operacione të sigurisë kombëtare.
Edhe varianti ekzistues ka marrë disa përditësime: shtytje më të lartë dhe fairing të ripërdorshme, bashkë me ndryshime për të shkurtuar kohën mes lançimeve.
Nuk ka ende një datë të saktë për fluturimin e radhës, por gjithçka tregon drejt fillimit të vitit 2026. Dhe mes gjithë kësaj, kompania mund të provojë së shpejti dërgimin dhe uljen e një landeri hënor pa ekuipazh. Hapësira pritet të bëhet shumë më e zhurmshme vitet në vijim.
