Prej dekadash, Gjermania është njohur si vendi më i hapur ndaj nudizmit në publik, falë traditës së saj historike Freikörperkultur (FKK). Por një studim i ri i institutit “YouGov”, i realizuar në gjashtë vende të Evropës Perëndimore, tregon se Danimarka ka kaluar në krye të listës si shteti më tolerant dhe praktik ndaj lakuriqësisë.
Sondazhi u zhvillua në Danimarkë, Gjermani, Spanjë, Francë, Itali dhe Mbretërinë e Bashkuar, duke analizuar qëndrimet e qytetarëve ndaj zhveshjes në hapësira publike dhe private.
Rezultatet zbuluan se danezët janë jo vetëm më të hapur ndaj nudizmit si ide, por edhe më aktivë në praktikimin e tij.
Ndërsa shumica e europianëve e shohin normale zhveshjen në plazhe nudiste të organizuara, danezët janë shumë më të lirshëm edhe në vende të zakonshme:
-35% e tyre e konsiderojnë të pranueshme zhveshjen edhe në plazhe jo nudiste.
-87% thonë se është krejt normale të jenë lakuriq në kopshtin e shtëpisë.
Në krahasim, në vendet e tjera këto shifra janë shumë më të ulëta.
Sipas të dhënave, 64% e të rriturve danezë e konsiderojnë larjen lakuriq si plotësisht të zakonshme.
Në Gjermani këtë e pranojnë 49%, në Spanjë 44%, në Mbretërinë e Bashkuar 32%, në Francë 31%, ndërsa në Itali vetëm 25%.
Studimi tregon gjithashtu se më shumë se gjysma e danezëve kanë qenë të zhveshur në publik të paktën një herë gjatë jetës.
Në Gjermani dhe Spanjë kjo përqindje është rreth 45%, në Francë 31%, në Britani 25%, dhe në Itali 22%.
Pra, ndryshe nga vendet e tjera, në Danimarkë nudizmi nuk është vetëm ide, por një realitet i përditshëm që shihet si shprehje natyrale e trupit dhe lirisë personale.
Megjithatë, Gjermania ruan epërsinë në numrin e plazheve dhe kampeve nudiste të organizuara, falë trashëgimisë së gjatë të kulturës FKK, edhe pse popullariteti i saj ka pësuar një rënie të lehtë vitet e fundit.
Ky studim konfirmon se Danimarka po udhëheq Evropën në qëndrimin ndaj trupit dhe pranimin e natyrshmërisë njerëzore, duke e bërë nudizmin pjesë të kulturës së saj moderne dhe të përditshme.
