Aktrimi i Blake Lively dhe Justin Baldoni në filmin “It Ends With Us” solli një sukses të madh financiar, duke gjeneruar 350 milionë dollarë të ardhura, por duket se bashkëpunimi i tyre në këtë projekt ka pasur shumë probleme pas kamerave.
Së fundmi, Lively ka ngritur një padi kundër Baldoni për ngacmim seksual gjatë xhirimeve të filmit, i cili u shfaq në gusht të këtij viti.
Sipas padisë, gjërat u përkeqësuan gjatë prodhimit, duke krijuar një mjedis të tensionuar dhe armiqësor në punë. Lively pretendon se një takim u zhvillua për të adresuar këto akuza, ku mori pjesë edhe bashkëshorti i saj, Ryan Reynolds. Në këtë takim, aktorja dhe Reynolds kërkuan që të merren masa të menjëhershme për të parandaluar situata të tilla të pakëndshme në të ardhmen. Ata kërkuan që Baldoni të mos bënte më komente për peshën e Lively, të mos përmendte babain e saj të vdekur dhe të mos bëheshin më shfaqje të videove ose imazheve nudo që përfshinin Lively-n.
Po ashtu, Lively kërkoi që gjatë xhirimeve të mos i kërkohej të shtonte skena seksi përtej asaj që kishte miratuar kur kishte nënshkruar për këtë projekt. Ajo pretendon se kërkesat e saj u pranuan dhe u miratuan nga studioja, por më vonë Baldoni dhe Wayfarer Studios, kompania e prodhimit, filluan një fushatë për të “shkatërruar” reputacionin e saj.
Ndërkohë, avokati i Baldoni ka reaguar, duke e cilësuar padinë si një përpjekje për të përmirësuar reputacionin negativ të Lively, duke shtuar se akuzat janë të rreme dhe të turpshme. Akuzat për sjelljen e Baldoni në xhirime dolën në dritë fillimisht këtë vit, kur media Daily Mail raportoi se aktori nuk respektonte kufijtë e kolegëve të tij gjatë punës në film. Po atë ditë, Page Six bëri të ditur se Baldoni kishte krijuar një atmosferë shumë të vështirë për të gjithë kastin gjatë xhirimeve të “It Ends With Us”.
