Gjatë ditëve të nxehta të verës, kondicioneri është bërë shpëtimi i shumë njerëzve. Megjithatë, edhe pse ndihmon në përballimin e vapës, përdorimi i zgjatur i tij, veçanërisht në temperatura shumë të ulëta, mund të shkaktojë një sërë shqetësimesh për organizmin.
Mjekët e familjes kanë shpjeguar për The Independent se cilat pjesë të trupit preken më shpesh nga ajri i kondicionuar dhe çfarë mund të bëni për të shmangur efektet e padëshiruara.
Lëkura thahet më shpejt
Sipas Dr. Opel Baker nga Klinika Mayfield në Brighton, kondicionerët largojnë lagështinë nga ajri për ta bërë ambientin më të freskët, por kjo bën që lëkura të humbasë më shpejt ujin.
Si pasojë, mund të shfaqen:
-tharje dhe ndjesi shtrëngimi në lëkurë;
-lëkurë që zhvishet;
-buzë të çara;
-përkeqësim i ekzemës ose irritimeve te personat me lëkurë të ndjeshme.
Mund të irritojë sytë
Ajri i thatë ndikon edhe te sytë, duke shkaktuar djegie, pickim dhe ndjesi sikur keni rërë në sy.
Personat që mbajnë lente kontakti janë më të rrezikuar të përjetojnë këto simptoma. Mjekët rekomandojnë të pulitni sytë më shpesh dhe, nëse është e nevojshme, të përdorni pika lubrifikuese për sytë.
Hundë dhe fyt të thatë
Kur ajri është shumë i thatë, thahet edhe mukoza e hundës dhe e fytit.
Kjo mund të shkaktojë:
-dhimbje fyti;
-bllokim të hundës;
-ngjirje të zërit;
-gjakderdhje nga hunda, sidomos nëse fryni hundën fort.
Dr. Lucy Hooper thekson se mukoza është pjesë e rëndësishme e mbrojtjes natyrale të organizmit, ndaj tharja e saj mund ta bëjë trupin më të ndjeshëm ndaj infeksioneve.
Mund të ndikojë edhe në mushkëri
Nëse filtrat e kondicionerit nuk pastrohen rregullisht, në ajër mund të qarkullojnë më shumë pluhur, polen dhe myk.
Kjo mund të:
-irritojë rrugët e frymëmarrjes;
-përkeqësojë astmën;
-rrisë rrezikun e infeksioneve respiratore, sidomos te personat me sëmundje kronike të mushkërive.
Dhimbje koke dhe tension muskulor
Qëndrimi për shumë orë në ambiente shumë të ftohta mund të shoqërohet edhe me:
-dhimbje koke;
-dhimbje në qafë dhe shpatulla;
-tension muskulor.
Sipas Dr. Baker, këto simptoma lidhen kryesisht me dehidratimin dhe ekspozimin e zgjatur ndaj ajrit të ftohtë.
Si të mbroheni?
Ekspertët rekomandojnë disa masa të thjeshta për të reduktuar efektet e kondicionerit:
-pini mjaftueshëm ujë gjatë gjithë ditës për të shmangur dehidratimin;
-përdorni krem hidratues për fytyrën dhe trupin, veçanërisht nëse qëndroni për orë të gjata në ambiente me kondicioner;
-zgjidhni produkte me glicerinë ose acid hialuronik, të cilat ndihmojnë në ruajtjen e lagështisë së lëkurës;
-përdorni balsam për buzët për të parandaluar tharjen;
-nëse mbani lente kontakti, kufizoni kohën e përdorimit ose aplikoni pika hidratuese për sytë;
-në makinë, drejtoni rrjedhën e ajrit larg fytyrës dhe syve;
-pastroni rregullisht filtrat e kondicionerit për të shmangur grumbullimin e pluhurit, polenit dhe mykut;
-nëse është e nevojshme, përdorni një lagështues ajri për të rikthyer lagështinë në ambient.
Dr. Lucy Hooper këshillon gjithashtu që kondicioneri të mos ndizet menjëherë sapo hyni në shtëpi apo në zyrë. Nëse temperaturat janë ende të përballueshme, është më mirë të prisni derisa vapa të shtohet gjatë pasdites, duke kufizuar kështu ekspozimin e panevojshëm ndaj ajrit të ftohtë.
