Ish-presidenti i Shteteve të Bashkuara, Donald Trump, 79 vjeç, është diagnostikuar me pamjaftueshmëri kronike venoze – një sëmundje e zakonshme, por shpesh e nënvlerësuar, që ndikon në qarkullimin e gjakut në këmbë.
Lajmin e bëri publik sekretarja e shtypit e Shtëpisë së Bardhë, Caroline Levitt, duke ngjallur reagime dhe kuriozitet për natyrën dhe rrezikshmërinë e kësaj sëmundjeje vaskulare.
Kirurgu vaskular Konstantinos N. Xiromeritis, drejtor i Klinikës së Katërt të Kirurgjisë Vaskulare – Lazer Endovaskular për Sëmundjet Venoze në spitalin Metropolitan General, ka shpjeguar se kjo është një sëmundje progresive që përkeqësohet me kalimin e kohës dhe është mjaft e përhapur në kulturat perëndimore – veçanërisht mes atyre që qëndrojnë gjatë në këmbë apo nuk bëjnë mjaftueshëm aktivitet fizik.
Cilat janë faktorët kryesorë të rrezikut?
Ekspertët theksojnë disa faktorë që rrisin ndjeshëm mundësinë për të zhvilluar pamjaftueshmëri venoze:
-Mosha: Sëmundja mund të shfaqet që në adoleshencë, por bëhet më e zakonshme pas moshës 65 vjeç. Statistikat tregojnë se rreth 70% e grave dhe 40% e burrave mbi këtë moshë kanë shenja të saj.
-Gjinia: Gratë janë më të predispozuara, kryesisht për shkak të ndryshimeve hormonale dhe shtatzënisë.
-Trashëgimia: Nëse të dy prindërit kanë vuajtur nga venat me variçe, fëmija ka deri në 80% gjasa të zhvillojë të njëjtën gjendje.
-Shtatzënia: Rrit rrezikun për shkak të presionit në qarkullimin venoz.
-Stili i jetesës sedentare dhe qëndrimi për kohë të gjatë në këmbë: Faktorë që ndikojnë drejtpërdrejt në zhvillimin e sëmundjes.
-Mbipesha: Rrit ndjeshëm presionin në venat e këmbëve.
-Traumat apo ndërhyrjet kirurgjikale në këmbë: Mund të dëmtojnë funksionin e valvulave venoze.
Si trajtohet?
Një nga trajtimet më të avancuara dhe efektive është lazeri endoluminal, një metodë minimalisht invazive që mbyll venat me funksion të dëmtuar duke përdorur energji laserike nga brenda venës.
Kjo teknikë është aktualisht ndër më të përdorurat në botë dhe rekomandohet nga institucionet më prestigjioze evropiane dhe amerikane në fushën e flebologjisë.
Sipas Dr. Xiromeritis, suksesi i kësaj metode është shumë i lartë dhe komplikacionet janë minimale, veçanërisht kur procedura kryhet nga një kirurg i specializuar në kushte teknologjie të avancuar.
Ndërsa publiku pret më shumë informacion mbi gjendjen shëndetësore të ish-presidentit Trump, diagnoza e tij mund të ndihmojë në rritjen e ndërgjegjësimit për një problem mjekësor që prek miliona njerëz në mbarë botën – shpesh në heshtje.
