Departamenti i Drejtësisë i SHBA-së ka publikuar mbi 11 mijë dokumente të reja lidhur me hetimet shumëvjeçare ndaj Jeffrey Epstein, duke rikthyer në qendër të vëmendjes një nga skandalet më të rënda të kohëve moderne.
Dosja përfshin email-e, foto, video, transkripte gjyqësore dhe dokumente të FBI-së që hedhin dritë mbi rrjetin e tij të gjerë të lidhjeve.
Sipas dokumenteve, Epstein kishte marrëdhënie me figura të fuqishme politike dhe mbretërore. Mes emrave të përmendur është edhe Donald Trump, për të cilin thuhet se ka udhëtuar tetë herë me avionin privat të Epstein mes viteve 1993–1996.
Në disa nga këto fluturime ka qenë e pranishme edhe Ghislaine Maxwell, e dënuar për trafikim seksual të të miturve.
Dokumentet përmendin gjithashtu një email të vitit 2001, të dërguar nga rezidenca mbretërore Balmoral, ku Prince Andrew i kërkon Maxwell-it t’i prezantojë “mikesha të pacipa”, mesazh që ka ngritur pikëpyetje serioze mbi lidhjet e tij me rrethin e Epstein.
Publikimi i dosjes ka rihapur debatin global mbi mënyrën se si Epstein ndërtoi lidhje me elita të fuqishme dhe mbi dështimet institucionale për të ndalur aktivitetet e tij kriminale, ndërsa kërkesat për transparencë dhe drejtësi vazhdojnë të rriten.
