Sfida e javës së 20-të në Kategorinë Superiore mes Vorës dhe Tiranës është mbyllur pa fitues.
Përballja në stadiumin e Vorës përfundoi 1-1, me të gjitha emocionet e grumbulluara në pjesën e dytë.
Tirana arriti të kalojë e para në avantazh falë golit të Ndong, i cili shënoi në minutën e 50-të dhe vuri bardheblutë në rrugën e duhur. Por ndryshimet e bëra nga pankina e Vorës sollën efekt.
Adeloje, i aktivizuar në pjesën e dytë, ndëshkoi miqtë duke rikthyer baraspeshën në minutën e 80-të.
Skuadra e Nuhijut mund të kishte marrë më shumë nga kjo ndeshje, por fati nuk ishte në anën e saj. Në dy minuta para fundit të kohës së rregullt, Tirana u ndal nga shtylla dhe traversa, duke humbur mundësi të artë për tre pikë.
LEXO EDHE: Statistikat e Dinamo-Vllaznia/ Me pikë të barabarta, përballje për “fronin”!
Pas këtij rezultati, bardheblutë mbeten në një pozitë delikate – tashmë katër pikë larg zonës së “play out”. Ndërkohë, Vora dhe Partizani, që gjenden në zonën e sigurisë, janë nëntë pikë përpara ekipit kryeqytetas.
Në orën 17:00, Partizani do të presë Teutën ku skuadra kërkojnë rikthimin te 3 pikët pas humbjes ndaj Vorës dhe barazimit ndaj Dinamos javën e shkuar.
Supersfida e javës padyshim është Dinamo-Vllaznia, e cila zhvillohet në orën 19:30.
