Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Meta Connect 2025
Teknologjia ka arritur në atë pikë ku dhe gjyshi mund të të marrë në telefon nëpërmjet syzeve… e mbase së shpejti do të na telefonojë nga këpuca…
Po, Meta njerëz…sapo prezantoi pajisjet e reja teknologjike në Connect 2025 – dhe këtë herë nuk bëhet fjalë për metaverse që s’e do njeri, por për disa produkte që mund ti mbash në fytyrë.
Ray-Ban Meta…u prezantua gjenerata e dytë që kushton 379$, ka dyfish më shumë bateri, pra tani mban deri në 8 orë dhe filmon në 3K Ultra HD. Po, mund të bësh “story” me syzet, edhe pse me baterinë s’ke për të xhiruar dot një dasmë shqiptare. Risia quhet conversation focus: nëse je në klub e s’dëgjohet as zëri yt, syzet fokusohen tek personi që flet me ty. Pra teknologjia që shpëton marrëdhëniet nga “hëë çfarë the?”.
Por kryefjala ishte Meta Ray-Ban Display. Këto syze kanë ekran direkt tek xhami i djathtë, ku shfaqen mesazhe, njoftime apo Google Maps. Dhe bashkë me to vjen dhe Meta Neural Band – një byzylyk që lexon sinjalet elektrike nga dora jote. Praktikisht, ti mund të përgjigjesh në WhatsApp duke bërë sikur po shkruan në ajër. Çmimi? 799$, ose ndryshe “syze + byzylyk që janë më të shtrenjtë se vetë telefoni yt”.
Natyrisht, prezantimi nuk shkoi perfekt. Mark Zuckerberg provoi një demo me një kuzhinier për të gatuar salcë koreane. Inteligjenca Artificiale e syzeve u hutua, përsëriste të njëjtën recetë gabim, dhe skena u kthye në komedi. Pra edhe kur ke miliarda dollarë buxhet, prapë Wi-Fi është armiku numër një.
Hot take? Meta po mundohet të na bindë që e ardhmja është “smart glasses first, smartphone second”. Por me këtë çmim e me këto kufizime baterie, duket më shumë si një aksesor cool për të bërë show – jo për të zëvendësuar telefonin tënd… të paktën jo akoma.
