Emma Stone ka folur hapur për arsyen pse nuk është e pranishme në Instagram, në një kohë kur rrjetet sociale janë kthyer pothuajse në domosdoshmëri për yjet e Hollywood-it.
Sipas aktores së njohur, vendimi i saj lidhet drejtpërdrejt me ruajtjen e shëndetit mendor dhe largimin nga presioni i vazhdueshëm i botës online.
Në një intervistë të fundit për Rolling Stone, aktorja 37-vjeçare, ylli i filmit Bugonia, tregoi se qëndrimi larg rrjeteve sociale është një zgjedhje e vetëdijshme. Ajo foli edhe për reklamën e re të Super Bowl-it që ka realizuar për kompaninë Squarespace, nën regjinë e Yorgos Lanthimos, e cila pritet të transmetohet të dielën, më 8 shkurt, mes çerekut të parë dhe të dytë të finales së madhe.
Në spotin reklamues, Stone shfaqet duke tentuar të blejë një domain dhe të krijojë një faqe interneti me emrin e saj të vërtetë, një situatë që, sipas saj, ka ndodhur realisht edhe jashtë kamerave.
Aktorja zbuloi se e ka blerë vërtet domain-in personal, por pa ndonjë plan konkret për ta përdorur.
E pyetur nëse do ta shndërronte ndonjëherë faqen e saj personale në një blog apo hapësirë online për fansat, Emma Stone u përgjigj pa hezitim:
Njëqind për qind jo. Kjo është arsyeja pse nuk kam Instagram.
Ajo shtoi se ndihet e shqetësuar për ndikimin që ekspozimi i vazhdueshëm në rrjete sociale mund të ketë tek shëndeti i saj mendor, duke theksuar se preferon të qëndrojë jashtë vëmendjes virtuale. Sipas saj, është më komode të jetë thjesht një vëzhguese nga distanca.
Megjithatë, Stone pranoi se ka një llogari në një platformë sociale, të cilën e përdor vetëm për të ndjekur zhvillimet e kulturës popullore, pa postuar apo u ekspozuar personalisht.
Vendimi i saj po vlerësohet nga shumë ndjekës si një shembull i qartë i vendosjes së kufijve personalë në një industri ku prania online shpesh shihet si e domosdoshme.
