Jennifer Lawrence ka bërë një rrëfim interesant nga fillimet e karrierës së saj, duke zbuluar se kishte vënë syrin te roli që më vonë do ta shndërronte Emma Stone në një nga aktoret më të kërkuara të Hollywood-it.
Bëhet fjalë për komedinë gjimnaziste të vitit 2010, Easy A, një film që shënoi kthesën vendimtare në karrierën e Emma Stone, pas roleve dytësore në projekte të suksesshme si Superbad dhe Zombieland.
Ndërkohë, i njëjti vit ishte po aq i rëndësishëm edhe për Jennifer Lawrence, e cila u bë e njohur për publikun e gjerë falë rolit të saj në Winter’s Bone, performancë që i solli edhe nominimin e saj të parë për çmimin Oscar.
Gjatë një interviste live të zhvilluar këtë të martë në sallën 92NY Kaufmann Concert Hall në New York, Lawrence pranoi me humor se kishte dëshiruar fort ta merrte rolin kryesor në Easy A, rol që përfundimisht iu besua Stone-s.
Roli që unë e doja dhe që ajo e fitoi ishte Easy A
-u shpreh aktorja 35-vjeçare, sipas People.
Isha e çmendur pas Easy A dhe vërtet mendoj se duhej ta kisha marrë unë rolin, apo jo? Filmi mund të kishte dalë shumë mirë
-shtoi ajo me nota shakaje.
Easy A është një adaptim modern dhe komik i romanit klasik The Scarlet Letter të Nathaniel Hawthorne.
Në film, Emma Stone interpreton një nxënëse të zgjuar dhe ironike të shkollës së mesme, e cila bëhet papritur në qendër të thashethemeve dhe një skandali që përhapet me shpejtësi në ambientin shkollor.
Roli jo vetëm që e bëri Stone një emër të njohur ndërkombëtarisht, por i hapi rrugën projekteve të mëdha që pasuan.
Dy vite më vonë, edhe Jennifer Lawrence do të përjetonte një ngjitje të ngjashme në karrierë, duke u shndërruar në një ikonë të kinemasë falë rolit të Katniss Everdeen në filmin e parë të sagës The Hunger Games.
Sot, Emma Stone (37) dhe Jennifer Lawrence (35) janë ndër aktoret më të vlerësuara të brezit të tyre dhe, pavarësisht konkurrencës profesionale në fillimet e karrierës, ato ndajnë një miqësi të ngushtë që ka zgjatur prej vitesh.
