Tommy Lee Jones po përjeton një nga periudhat më të errëta të jetës së tij, pas humbjes së papritur të vajzës së tij, Victoria Jones. Ngjarja e rëndë ka ndodhur më 1 janar, në Ditën e Vitit të Ri, dhe ka lënë familjen e aktorit të shkatërruar emocionalisht.
Victoria, 34 vjeç, u gjet e pajetë në katin e 14-të të hotelit luksoz Fairmont San Francisco. Sipas raportimeve, personi që e gjeti fillimisht dyshoi se ajo kishte humbur ndjenjat pas konsumit të alkoolit dhe njoftoi menjëherë stafin e hotelit, i cili kontaktoi shërbimet e urgjencës.
Autoritetet e regjistruan thirrjen si “kod 3 për mbidozë dhe ndryshim ngjyre”, ndërsa shkaku zyrtar i vdekjes nuk është konfirmuar ende.
Në ditët që pasuan, janë publikuar disa foto të fundit të Victorias, ku ajo shfaqet e lodhur dhe e çrregullt, duke nxitur spekulime mbi gjendjen e saj para tragjedisë. Burime pranë aktorit kanë treguar se Jones është tërhequr plotësisht dhe është i shkatërruar nga dhimbja.
Ai nuk është më vetvetja. Tommy është zemërthyer. Humbja e një fëmije është një goditje që edhe njerëzit më të fortë nuk e përballojnë lehtë
-tha një burim për Daily Mail.
Victoria ishte vajza e aktorit dhe ish-bashkëshortes së tij, Kimberlea Cloughley. Ata kanë edhe një djalë, Austin Jones, 43 vjeç.
Familja ka reaguar me një deklaratë të shkurtër, duke kërkuar privatësi në këtë moment të vështirë.
Ne i vlerësojmë të gjitha fjalët e mira, mendimet dhe lutjet. Ju lutemi të respektoni privatësinë tonë gjatë kësaj kohe
-thuhet në deklaratën e dhënë për CBS News.
Edhe pse nuk kërkoi kurrë famën në të njëjtën mënyrë si i ati, Victoria kishte bërë disa hapa në industrinë e argëtimit.
Ajo u shfaq në filmin Men in Black II, kishte role në serialin One Tree Hill dhe në filmin The Three Burials of Melquiades Estrada, të drejtuar nga babai i saj.
Ngjarja mbetet ende e mbështjellë me mister, ndërsa familja Jones përpiqet të përballojë një humbje që ka tronditur jo vetëm jetën e tyre private, por edhe publikun.
