Aktori hollivudian George Clooney ka ndarë detaje të rralla mbi sekretin e martesës së tij të lumtur me avokaten e njohur Amal Clooney.
Në një intervistë për CBS News, 63-vjeçari zbuloi se gjatë gjithë viteve të tyre së bashku, ai dhe bashkëshortja e tij nuk janë grindur asnjëherë.
Unë dhe Amal nuk jemi grindur kurrë
-tha Clooney me sinqeritet.
Kur je më i ri, do të kesh gjithmonë të drejtë për gjithçka. Por tani jam në një fazë të jetës sime ku, nëse ajo vendos ta lyejë murin me të kuqe, thjesht nuk më intereson. Nuk ia vlen të humbasësh energji për gjëra të vogla.
Aktori shtoi se çelësi i harmonisë qëndron te pjekuria dhe mbështetja e ndërsjellë.
Arrin në një pikë në jetë ku thua: ‘Pse duhet të jetë kjo një debat?’ Ne kemi një marrëdhënie të jashtëzakonshme sepse e përkrahim shumë njëri-tjetrin
-u shpreh ai, duke shtuar se në rininë e tij do të kishte reaguar ndryshe ndaj situatave të vogla.
George dhe Amal Clooney u njohën në korrik të vitit 2013 përmes një miku të përbashkët. Vetëm një vit më vonë, në prill të 2014-s, aktori i propozoi Amal, ndërsa dasma madhështore u mbajt në Venecia në shtator të po atij viti. Tre vjet më vonë, çifti u bë prindër të binjakëve, Alexander dhe Ella.
Në fund të intervistës, Clooney theksoi se sekreti i vërtetë i një martese të qëndrueshme është respekti dhe dashuria e ndërsjellë:
Kam dikë për të cilin kujdesem më shumë se çdo gjë tjetër në botë – dhe kjo është ndjenja më e mirë që mund të ekzistojë.
