Një fosil i thjeshtë, i harruar për dekada në një sirtar në Britani, është konfirmuar si kocka e parë e një dinosauri të zbuluar ndonjëherë në Antarktidë. Sipas BBC, fosili ishte gjetur fillimisht në vitin 1985 në ishullin James Ross, por studiuesit e asaj kohe nuk ishin të sigurt për origjinën e tij dhe e kishin ruajtur në koleksionet e British Antarctic Survey në Cambridge, pa e analizuar më tej.
Vetëm pas 40 vitesh, një paleontolog e rishikoi materialin dhe kuptoi se bëhej fjalë për një rruazë bishti të një dinosauri të tipit Titanosaur, një nga grupet që përfshin disa nga kafshët më të mëdha që kanë ecur ndonjëherë në Tokë. Sipas ekspertëve, forma e veçantë e kockës e identifikon qartë si pjesë të këtij grupi dinosaurësh, të cilët kishin qafë dhe bisht shumë të gjatë dhe jetonin në zona të pasura me bimësi.
Shkencëtarët vlerësojnë se ekzemplari i gjetur i përkiste një dinosauri rreth 7 metra të gjatë, ndoshta i ri ose një specie më e vogël brenda familjes së Titanosaurëve. Zbulimi hedh më shumë dritë mbi jetën në Antarktidë rreth 82 milionë vite më parë, kur kontinenti nuk ishte i mbuluar nga akulli, por kishte pyje të dendura dhe klimë më të butë, duke mbështetur një ekosistem të pasur me jetë. Sipas studiuesve, fakti që një fosil kaq i rëndësishëm u gjet vetëm rastësisht në një arkiv tregon se ende ka shumë zbulime të fshehura në koleksionet shkencore të botës.
Alain Cabot, i cili zotëron një muze dinosaurësh të quajtur Musée Parc des Dinosaures, ka gjetur rreth 100 vezë të fosilizuara dinosaurësh në tokën e tij. Vezët janë afërsisht sa madhësia e një shalqiri të vogël dhe mendohet të jenë rreth 72 milionë vjeçare. Alain mendon se vezët mund të jenë vendosur nga dinosaurët gjigantë barngrënës që ishin të gjatë rreth 15 metra dhe peshonin midis 15 dhe 20 ton. “Është një depozitë e jashtëzakonshme dhe do të duhen breza të tërë paleontologësh për ta studiuar atë. Ka miliona vezë në Francën jugore. Mendoj se mund të jetë depozita më e madhe në botë”, tha Alain Cabot në një intervistë me The Times.
