Një nga makinat më të veçanta që lidhet me ikonën e muzikës rock’n’roll, Elvis Presley, ka dalë në shitje në eBay për një çmim prej vetëm 10 mijë eurosh. Bëhet fjalë për Cadillac Eldorado-n e vitit 1970, i transformuar në mënyrë drastike nga dizajneri legjendar Jay Ohrberg në një automjet që ngjan me një kitarë gjigante – i njohur ndryshe si “Guitar Car”.
Ky automjet unik, që dikur u përdor nga Elvis për të mbërritur në një koncert në Las Vegas mes vëmendjes së madhe të publikut, u ndërtua përmes një procesi që zgjati plot dy vite.
Ohrberg modifikoi Eldorado-n duke e ndarë në mes dhe duke i shtuar një pjesë të gjatë në formë qafe kitareje. Pjesa e pasme u ridizajnua për të imituar trupin e një kitare elektrike, me bishta të mëdhenj që ngjasojnë me ato të avionëve me reaktivë.
Vetura ishte e pajisur me motorin gjigant V8 8.2 litra – i njohur si Cadillac 500 – me 400 kuaj fuqi dhe 746 Nm çift rrotullues, i lidhur me një transmision automatik me tre shpejtësi.
Në atë kohë, kjo makinë peshonte mbi 2 tonë dhe ishte simbol i luksit dhe fuqisë.
Ndër elementët më të veçantë të dizajnit të “Guitar Car” përfshiheshin: tela dekorative, pjesë që imitonin mekanizmat e akordimit, dhe një “skenë” të vogël në vendin ku normalisht ndodhej grykëzimi i një kitare.
Pavarësisht lidhjes me emrin e Elvis Presley-t, sot për këtë makinë dihet shumë pak. Aktualisht ajo ndodhet në Orleans, Francë, dhe ndonëse historia e kalimit të saj në Evropë mbetet e paqartë, ajo është e listuar si automjet jashtë funksionit që kërkon restaurim total.
Për koleksionistët e apasionuar pas historisë së makinave dhe muzikës, kjo është një mundësi e rrallë për të rikthyer në jetë një pjesë të trashëgimisë së Mbretit të Rock-ut.
