Fejesa e shkurtër por shumë e përfolur e Gwyneth Paltrow dhe Brad Pitt në mesin e viteve ’90 mbetet një nga historitë më të komentuara të Hollivudit. Megjithëse çifti dukej perfekt në publik, pas fasadës fshihej një marrëdhënie e mbushur me tensione dhe papajtueshmëri.
Sipas biografisë së re të autorës Amy Odell, “Gwyneth: The Biography”, e cila do të publikohet më 29 korrik, arsyeja kryesore e ndarjes së tyre ishin dallimet e mëdha në karakter dhe stil jetese.
Paltrow, e rritur në një mjedis intelektual dhe elitar në Nju Jork, e konsideronte Pitt-in – i cili vinte nga një familje konservatore në Misuri – si më pak të sofistikuar.
Ajo mendonte se ishte më e zgjuar, më e arsimuar dhe më e kulturuar se ai
-shkruan autorja.
Vetë aktorja ka rrëfyer se gjatë takimeve të tyre, shpesh i duhej t’i shpjegonte Pitt-it ushqimet që konsumonin, si për shembull llojet e havjarit. Sipas miqve të saj, ajo shpesh qante gjatë lidhjes, duke u ndjerë e pasigurt dhe e kërcënuar nga suksesi i aktorit.
Edhe pse në vitin 1996, Brad Pitt e quajti Paltrow “engjëlli” dhe “dashuria e jetës së tij” gjatë fjalimit në Golden Globes, dyshimet e aktores për të ardhmen e tyre kishin filluar të thelloheshin.
Në një intervistë të kohëve të fundit për podkastin Call Her Daddy, Paltrow pranoi se nuk ishte gati për martesë në atë periudhë të jetës së saj, edhe pse ndarja e la pasojat e veta emocionale.
Pas ndarjes, të dy kanë ndjekur rrugë të ndryshme. Pitt u shndërrua në një ikonë globale të kinemasë, ndërsa Paltrow ndërtoi perandorinë e saj të stilit të jetesës përmes markës Goop, duke mishëruar jetën që gjithmonë kishte aspiruar.
