Inflacioni bazë iu kthye rritjes në muajin shtator dhe arriti nivelin më të lartë që prej vitit 2023. Sipas të dhënave nga Banka e Shqipërisë, u rrit në 3.07%, nga 2.84% që kishte qenë për gushtin. Po ashtu, inflacioni bazë ka thelluar rritjen me bazë vjetore. Shtatorin e vitit të kaluar, ishte në nivelin 2.37%.
Nënshporta që mat inflacionin bazë është zgjeruar lehtësisht me rishikimin e peshave në vitin 2025, në 69.6% të totalit të shportës së IÇK-së, nga 69% më 2024-ën.
Inflacioni bazë përjashton kryesisht ato produkte që kanë luhatshmëri të lartë, produktet ushqimore dhe ato energjetike e ka si qëllim kryesor ta zhveshë rritjen e përgjithshme të çmimeve nga luhatjet me natyrë më afatshkurtër.
Paralelisht, edhe inflacioni bazë neto për shtatorin u rrit në 3.4%, nga 2.99% që kishte qenë për gushtin dhe ngelet gjithashtu në rritje krahasuar me nivelin prej 2.19% të një viti më parë.
Inflacioni bazë neto përjashton më tej nga inflacioni edhe nëngrupet e ushqimeve të përpunuara (përfshirë bukën e drithërat) dhe matet mbi 44.6% të shoqërisë së IÇK-së.
Ndërkohë, inflacioni që përjashton të gjitha produktet ushqimore dhe energjetike për muajin shtator u rrit në 3.28%, nga 2.89% që kishte qenë në muajin gusht.
Sipas INSTAT-it, inflacioni total në ekonomi, i matur për të gjithë shportën e mallrave dhe shërbimeve të konsumit për shtatorin u rrit në 2.4%, nga 2.3% që kishte qenë për muajin gusht dhe gjithashtu në rritje nga niveli prej 1.9% që ishte një vit më parë.
Inflacioni vazhdon të jetë poshtë objektivit prej 3%, i ndikuar nga rënia e inflacionit nga jashtë, mbiçmimi i kursit të këmbimit dhe goditjet e përsëritura të ofertës.
Por, nga ana tjetër, inflacioni bazë dhe presionet e brendshme inflacioniste mbeten të larta e gjithnjë e më mbizotëruese në formimin e inflacionit total. Sipas Bankës së Shqipërisë, kjo sugjeron se aktiviteti ekonomik është pranë potencialit.
Në raportin e politikës monetare për tremujorin e tretë të vitit, Banka e Shqipërisë parashikonte që inflacioni do të kthehet pranë objektivit prej 3% brenda gjysmës së parë të vitit të ardhshëm. Megjithatë, Banka Qendrore theksoi edhe njëherë se perspektiva e zhvillimeve ekonomike rrethohet nga pasiguri të shtuara, që kryesisht burojnë nga tensionet gjeopolitike dhe tensionet e rritura ekonomike e tregtare në ambientin e huaj./Monitor
