James Corden ka hequr dorë përfundimisht nga planet ambicioze për ta shndërruar pronën e tij luksoze në Oxfordshire në një rezidencë madhështore familjare. Aktori dhe prezantuesi britanik e ka shitur shtëpinë art-deco Templecombe House, më shumë se gjashtë vite pasi e bleu për rreth 8 milionë paund.
Prona, e vendosur pranë Henley-on-Thames, ishte planifikuar të shembej për t’u zëvendësuar me një vilë moderne me gjashtë dhoma gjumi, pishinë dhe ambiente spa.
Edhe pse leja e ndërtimit u miratua në vitin 2023, projekti nuk nisi kurrë dhe shtëpia mbeti e braktisur, duke u kthyer në shënjestër vandalësh dhe eksploruesish urbanë.
Ndërkohë, Corden, bashkëshortja e tij Julia Carey dhe tre fëmijët jetojnë prej kohësh në Londrën veriperëndimore, në një pronë luksoze me vlerë rreth 11.5 milionë paund, e cila është baza e tyre kryesore në Mbretërinë e Bashkuar.
Sipas burimeve pranë aktorit, familja është tashmë e vendosur përfundimisht në Londër dhe nuk kishte më plane për t’u zhvendosur në zonën rurale.
Vendimi për shitjen e pronës i jep fund edhe kritikave të banorëve lokalë, të cilët prej kohësh kishin shprehur pakënaqësi për lënien e shtëpisë në gjendje të degraduar.
Shuma e saktë e shitjes nuk është bërë publike, por largimi i Corden nga ky projekt shënon mbylljen e një kapitulli të shumëpërfolur në jetën e tij jashtë skenës.
