Jim Carrey bëri që fansat të “fërkonin sytë” kur u shfaq në tapetin e kuq të César Awards, në edicionin e 51-të të mbajtur në Paris, në sallën legjendare L’Olympia.
Aktori 64-vjeçar u paraqit me një kostum elegant të zi, duke marrë një César nderi për karrierën e tij disa-dekadëshe. Në një fjalim emocional, ai ia dedikoi çmimin babait të ndjerë, duke prekur zemrat e publikut.
Babai im ishte tipi i njeriut që, nëse e takoje për pesë minuta, ndiheshe sikur e njihje prej 50 vitesh
-tha ai në një moment që u bë viral.
Megjithatë, përveç nderimit, vëmendja në rrjet u përqendrua te pamja e tij. Brenda pak minutash, mediat sociale u mbushën me komente për ndryshimin e dukshëm në fytyrën e aktorit, me disa fansa që spekuluan hapur për ndërhyrje estetike.
Komentet varionin nga “Duket shumë ndryshe” deri te krahasime të papritura me Bill Maher, madje pati edhe referenca për operacionin estetik të fundit të Kris Jenner. Disa të tjerë shkuan edhe më tej, duke ngritur teori konspirative apo duke pyetur nëse “po mbante maskë”.
Pavarësisht zhurmës online, shumë fansa zgjodhën të fokusohen te arritjet e tij artistike, duke kujtuar filmat ikonë si The Mask, Ace Ventura: Pet Detective, Liar Liar dhe Eternal Sunshine of the Spotless Mind.
Në tapetin e kuq, Carrey u shoqërua nga vajza e tij Jane, nipi Jackson dhe partnerja e tij Min Ah, të cilës iu referua me fjalë dashurie në një fjalim të mbajtur tërësisht në frëngjisht.
Gjatë ceremonisë, regjisori Michel Gondry kujtoi bashkëpunimin e tyre në “Eternal Sunshine of the Spotless Mind”, duke e bërë momentin edhe më domethënës.
Dalja e tij në César Awards ishte domethënëse edhe për një tjetër arsye: pas një pauze katërvjeçare nga rolet madhore, ai u rikthye në vitin 2020 si Dr. Robotnik në Sonic the Hedgehog.
Në vitin 2022, ai kishte lënë të kuptohej se mund të tërhiqej nga aktrimi, duke thënë se “kishte bërë mjaftueshëm”. Megjithatë, ai u rikthye sërish në rolin e tij në “Sonic 3” dhe pritet të shfaqet edhe në “Sonic 4”, i planifikuar për vitin 2027.
Mes emocioneve, homazheve dhe spekulimeve, një gjë mbetet e qartë: Jim Carrey di ende si të rrëmbejë vëmendjen, qoftë për talentin, qoftë për transformimet që ndezin debat.
