Kina po i kërkon industrisë së automjeteve elektrike në vend që të ndalojë uljen e çmimeve dhe të frenojë prodhimin, mes frikës se deflacioni i vazhdueshëm po rrezikon rritjen ekonomike. Në muajt e fundit, zyrtarët kinezë kanë folur vazhdimisht për nevojën për të luftuar involucionin në sektorët që vuajnë nga mbikapaciteti, siç janë automjetet elektrike, duke iu referuar fenomenit të investimit të më shumë përpjekjeve dhe parave për fitime në rënie.
Xi Jinping ka folur lidhur me këtë shqetësim. Në një fjalim këtë muaj, presidenti i Kinës kritikoi qeveritë provinciale për investime të tepërta verbërisht në inteligjencën artificiale, në fuqinë kompjuterike dhe në automjetet me energji të re, industri që Pekini i ka identifikuar si përparësi strategjike, por që janë gjithashtu në rrezik mbiprodhimi. Më 23 korrik, Xi mbajti një fjalim tjetër në të cilin theksoi rëndësinë e thyerjes së ciklit të “involucionit” që ka përfshirë pjesë të ekonomisë kineze , e dyta më e madhe në botë pas SHBA-së.
Disa nga kompanitë e mëdha të makinave në Kinë, përfshirë BYD, prodhuesin e automjeteve elektrike që shihet si rivali i Teslës në Kinë, u thirrën në takime me rregullatorët muajin e kaluar për të marrë paralajmërime për mbikapacitet. Hutong Research, një firmë këshillimore e pavarur me seli në Pekin dhe Shangai, tha në një shënim të kohëve të fundit: “Agjencitë qeveritare në të gjithë Kinën kanë vepruar me shpejtësi në përgjigje të vërejtjeve të fundit të Xi-së, duke u zotuar të zbatojnë reduktime në anën e ofertës.
Këto zhvillime nxjerrin në pah jo vetëm vëmendjen e shtuar politike ndaj kapacitetit të tepërt, por edhe gjerësinë e problemit në të gjithë ekonominë e Kinës.” Në Kinë, kompanitë në të gjitha industritë shpesh i ulin çmimet afër ose nën nivelet e kostos, në një lojë për dominim në treg. Ndërkaq, në Europë, Shqipëria kryeson për preferencën për të pasur makina me motor të fuqishëm. Sipas të dhënave të Eurostat-it, të përpunuara nga “Monitor”, 27.8% e totalit të automjeteve të pasagjerëve në vend ishin mbi 2 mijë kubikë për vitin 2024, ku sipas fuqisë u numëruan vetëm makinat që funksionojnë me naftë. Kjo është pesha më e lartë e makinave me këtë fuqi motorike në Europë, në raport me totalin e automjeteve të pasagjerëve.
