Mes kaosit, në Kuvendin e Shqipërisë, u votëbesuan zv.kryeministrja dhe ministrat e rinj, pas dekretimit të një dite më parë nga presidenti Bajram Begaj të 7 ndryshimeve në qeveri, të propozuara nga kryeministri Edi Rama. Votimi u zhvillua ndërsa opozita mbante të bllokuar foltoren.
Seanca plenare nisi me debate mbi kërkesën e SPAK-ut për heqjen e imunitetit Belinda Ballukut. Demokratët kërkuan të futet në rend dite raporti i tyre pro heqjes së imunitetit. Gazment Bardhi akuzoi maxhorancën se po zgjat shqyrtimin dhe ka mbetur vetëm një javë që kërkesa të konsiderohet e rrëzuar.
Por, kreu i grupit të PS-së, Taulant Balla iu përgjigj duke i kujtuar se janë brenda afatit 2 javor për të hartuar raportin e tyre, të cilin do ta sjellin në Kuvend në seancën e 12 marsit, bashkë me raportin e opozitës.
Shkarkimet:
Belinda Balluku 85 vota
Elisa Spiropali 83 vota
Pirro Vengu 81 vota
Albana Koçiu 83 vota
Besfort Lamallari 83 vota
Toni Gogu 82 vota
Emërimet
Albana Koçiu zv/kryeministre 83 vota pro 3 kundër
Ferit Hoxha ministër i Jashtëm 83 pro 4 kundër
Besfort Lamallari ministër i Brendshëm 83 vota pro 4 kundër
Ermal Nufi ministër i Mbrojtjes 83 vota pro 6 kundër
Toni Gogu ministër i Drejtësisë 83 vota pro 5 kundër
Enea Karakaçi ministër i Infrastrukturës dhe Energjisë 83 vota pro 6 kundër
Eriona Ismaili ministre e Shtetit për Marrëdhënie me Parlamentin 82 vota pro 4 kundër
Me kërkesë të PS-së, seanca parlamentare nisi me 1 minutë heshtje për heroin Adem Jasharin dhe familjen e tij në Prekaz. Më 5 mars 1998, Serbia nisi sulmet ndaj familjes Jashari në Prekaz. Ndërkaq, Partia Demokratike kërkoi 1 minutë heshtje për ish-deputetin Tomor Dosti, i ndarë nga jeta dje.
Më herët, deputeti i partisë “Mundësia”, Agron Shehaj u përjashtua me 20 ditë nga punimet e Kuvendit. Ky vendim u mor në mbledhjen e Sekretariatit për Procedurat, Votimet dhe Etikën, me kërkesë të maxhorancës.
PS-ja kujtoi se në seancën e kaluar, Shehaj bllokoi foltoren dhe refuzoi të dilte nga salla, pas masës për përjashtim duke penguar punimet.
Ai ngriti zërin për banorët e Rrjollit dhe protestat që ata po zhvillojnë prej një muaji, kundër ndërtimit të një resorti, duke pretenduar se janë tokat e tyre.
Ndërkaq, pas një ndërprerjeje të shkurtër disa minutëshe, rinisi seanca parlamentare.
