Luke Wilson ka nisur një kapitull krejtësisht të ri në jetën e tij personale. Aktori i njohur amerikan është bërë baba për herë të parë në moshën 54-vjeçare, duke mirëpritur një vajzë me partneren e tij, Kendall Yates.
Lajmi u konfirmua nga revista People, ndërsa çifti u shfaq për herë të parë në publik me të porsalindurën gjatë promovimit të serialit të ri të Wilson, “The Hawk”, në Newport Beach të Kalifornisë.
Në paraqitjen e tyre, Kendall Yates mbante vogëlushen në një mbajtëse për foshnja, ndërsa në fund të aktivitetit, çifti ua prezantoi vajzën kolegëve të aktorit dhe të ftuarve të pranishëm.
Luke Wilson dhe Kendall Yates kanë zgjedhur ta mbajnë marrëdhënien e tyre larg vëmendjes mediatike, edhe pse janë bashkë prej disa vitesh. Ata kanë qenë gjithmonë të rezervuar për jetën private dhe rrallë janë shfaqur së bashku në publik.
Aktori kishte folur edhe më herët për dëshirën e tij për t’u bërë baba, duke pranuar në intervista se me kalimin e viteve kishte filluar të reflektonte më shumë për jetën personale dhe familjen.
Me një karrierë që shtrihet në më shumë se tre dekada, Luke Wilson është një nga emrat më të njohur të Hollivudit. Ai ka interpretuar në filma të suksesshëm si “Legally Blonde”, “The Royal Tenenbaumsdhe Anchorman”, ndërsa ka bashkëpunuar shpesh me regjisorin Wes Anderson.
Në vitet e fundit, ai është parë edhe në seriale të njohura si “Stargirl” dhe “The Righteous Gemstones”.
Lindja e vajzës shënon një moment të veçantë për aktorin, i cili tani përjeton për herë të parë rolin e babait.
