Prokurorët në Mbretërinë e Bashkuar kanë konfirmuar zyrtarisht se kanë autorizuar ngritjen e 21 akuzave penale kundër vëllezërve Andrew dhe Tristan Tate, duke përfshirë përdhunim, dëmtime të rënda trupore dhe trafikim qeniesh njerëzore.
Shërbimi i Prokurorisë së Kurorës (CPS) bëri të ditur se akuzat janë miratuar që në vitin 2024, përpara se të kërkohej ekstradimi i tyre nga Rumania, ku ata aktualisht përballen me procese të ngjashme penale. CPS nënvizoi se hetimet në Rumani duhet të përfundojnë para se të procedohet më tej në Mbretërinë e Bashkuar.
Vendimi për ngritjen e akuzave erdhi pasi Policia e Bedfordshire dorëzoi një dosje me prova që përfshinte dëshmi të viktimave dhe të dhëna të tjera hetimore.
Sipas deklaratës zyrtare, Andrew Tate, 38 vjeç, një ish-kikboksier dhe influencues me miliona ndjekës në rrjetet sociale, përballet me 10 akuza që lidhen me tre viktima të dyshuara.
Ndër to përfshihen përdhunimi, dëmtimi trupor, trafikimi dhe kontrollimi i prostitucionit për qëllime përfitimi. Ndërkohë, vëllai i tij, Tristan Tate, 36 vjeç, përballet me 11 akuza që lidhen me një viktimë të supozuar.
Të lindur në SHBA, vëllezërit Tate u zhvendosën në Luton të Anglisë me nënën e tyre pas ndarjes së prindërve.
Gjatë viteve të fundit, Andrew Tate ka ndërtuar një profil të madh në internet, shpesh duke promovuar një mënyrë jetese ekstravagante me makina luksoze, avionë privatë dhe jahte.
Dyshja u arrestuan për herë të parë në Rumani në dhjetor të vitit 2022, ku u akuzuan për trafikim qeniesh njerëzore dhe përdhunim, akuza që ata i mohojnë kategorikisht.
Proceset ligjore ndaj tyre pritet të marrin zhvillime të mëtejshme ndërsa drejtësia rumune dhe ajo britanike koordinojnë hapat e ardhshëm.
