Gjiganti i teknologjisë Meta ka rënë dakord të paguajë 25 milionë dollarë për të zgjidhur një mosmarrëveshje ligjore me presidentin amerikan Donald Trump, pasi ai paditi kompaninë për pezullimin e llogarive të tij pas trazirave të 6 janarit në Kapitol, sipas tre personave të njohur me çështjen.
Është rasti i fundit i një korporate të madhe që zgjidh çështje gjyqësore me presidentin e ri, i cili ka kërcënuar me hakmarrje ndaj kritikëve dhe rivalëve të tij. Ajo vjen gjithashtu pasi Meta dhe CEO i saj, Mark Zuckerberg, i janë bashkuar kompanive të tjera të mëdha teknologjike duke u përpjekur “të përafrohen” me administratën e re Trump. Njerëzit e njohur me këtë çështje folën në kushte anonimiteti të mërkurën për të diskutuar rreth marrëveshjes.
Dy nga njerëzit thanë se kushtet e marrëveshjes përfshijnë 22 milionë dollarë që shkojnë për organizatën jofitimprurëse që do të bëhet biblioteka e ardhshme presidenciale e Trump. Zuckerberg vizitoi Trumpin në nëntor në pronën e tij në Mar-a-Lago në Florida për t’u përpjekur të “ndreqte dallimet” me presidentin e ardhshëm, diçka që kanë bërë edhe zyrtarë të tjerë të teknologjisë, biznesit dhe qeverisë.
Disa ditë pasi kompania kineze DeepSeek zbuloi një përparim AI që tronditi industrinë e teknologjisë në SHBA, shefat ekzekutivë të Microsoft dhe Meta mbrojtën shpenzimet masive që ata thanë se ishin thelbësore për të qëndruar konkurrues në fushën e re. Përparimi i shpejtë i DeepSeek ka ngjallur dyshime për udhëheqjen që ka Amerika në AI me modele që ajo pretendon se mund të përputhen apo edhe t’i tejkalojnë rivalët perëndimorë me kosto, por drejtuesit amerikanë thanë se ndërtimi i rrjeteve të mëdha kompjuterike ishte i nevojshëm për t’i shërbyer nevojave të korporatave në rritje.
