Kompania Meta po përballet me probleme të mëdha teknike në rrjetet sociale Facebook dhe Instagram, duke prekur miliona përdorues në mbarë botën. Ndërprerja e papritur ka bërë të pamundur aksesimin e platformës për shumë përdorues.
Raportimet tregojnë se përdoruesit nuk mund të hyjnë në llogaritë e tyre, ndërsa shumë prej atyre që ishin aktivë janë nxjerrë automatikisht nga sistemi.
Për disa, platforma shfaq mesazhin “llogaria është e padisponueshme” si në versionin web, ashtu edhe në aplikacionin mobil.
Për ata që ishin aktivë në momentin e ndërprerjes, sistemi i ka detyruar të dalin nga llogaria, duke mos lejuar rikthimin.
Problemet nuk lidhen vetëm me postimet apo ngarkimin e përmbajtjes, por me vetë aksesin në llogari, duke e bërë të pamundur përdorimin normal të rrjeteve sociale. Përdoruesit e Messenger gjithashtu raportojnë vështirësi në komunikim.
Mijëra persona kanë përdorur platformën Downdetector për të raportuar problemet.
Një përdorues shkroi:
Nuk mund të hyj në Facebook, thjesht thotë se llogaria është e padisponueshme.
Një tjetër shtoi: Eshtë hera e tretë brenda një muaji që ndodh kjo.
Shumë përdorues të prekur kanë zgjedhur të raportojnë situatën në platforma alternative si Twitter/X, ku ankesa masive kanë bërë që #Facebook të kthehet në trend global.
Deri më tani, Meta nuk ka dhënë reagim zyrtar për shkakun e problemeve teknike dhe nuk ka ofruar një afat kohor për rikthimin e plotë të shërbimeve.
