Një nga enigmat më të famshme të Oqeanit Atlantik mund të jetë më në fund drejt zgjidhjes. Shkencëtarët kanë zbuluar arsyen pse Bermuda ka arritur të qëndrojë mbi sipërfaqen e detit për më shumë se 30 milionë vite, edhe pse aktiviteti i saj vullkanik është shuar prej kohësh.
Sipas një studimi të realizuar nga studiues të Institutit Carnegie për Shkencë dhe Universitetit Yale, poshtë Bermudës ndodhet një strukturë gjigante shkëmbore që funksionon si një “platformë natyrale”, duke e mbajtur ishullin të ngritur mbi oqean.
Për vite me radhë, gjeologët janë habitur nga fakti se si Bermuda nuk është fundosur gradualisht, siç ndodh zakonisht me ishujt vullkanikë pasi humbin burimin e nxehtësisë nga thellësia e Tokës.
Tani, studiuesit thonë se kanë identifikuar një shtresë masive shkëmbore rreth 19 kilometra të trashë, e cila ndodhet nën koren oqeanike. Ky material është më i lehtë se shkëmbinjtë përreth dhe krijon një efekt “notues”, duke mbajtur të gjithë zonën të ngritur.
Sipas ekspertëve, kjo strukturë është formuar 30 deri në 35 milionë vite më parë, kur magma e nxehtë u përhap nën fundin e oqeanit dhe më pas u ftoh duke krijuar një bazë të fortë shkëmbore.
Për të arritur në këtë zbulim, ekipi analizoi mbi dy dekada të dhënash sizmike nga tërmetet natyrore, duke krijuar një hartë të detajuar të strukturës së nëntokës deri në më shumë se 40 kilometra thellësi.
Zbulimi ka rikthyer gjithashtu vëmendjen te “Trekëndëshi i Bermudës”, pasi studiuesit pranojnë se zona ka anomali natyrore gravitacionale dhe magnetike. Në disa pjesë, graviteti rezulton pak më i dobët për shkak të shkëmbinjve të lehtë, ndërsa prania e mineraleve si hekuri dhe titani mund të ndikojë në sinjalet magnetike dhe pajisjet e navigimit.
Megjithatë, ekspertët theksojnë se bëhet fjalë për fenomene krejtësisht natyrore dhe jo për teori misterioze apo paranormale.
Bermuda vazhdon të na surprizojë, sepse shumë prej tipareve të saj nuk përputhen me modelet klasike gjeologjike
-u shpreh studiuesi William Frazer, duke shtuar se Toka ende fsheh procese që shkenca nuk i kupton plotësisht.
