Aktori i njohur Tom Hanks ka zbuluar se ai dhe pjesa tjetër e kastit të filmit “Toy Story 5” nuk kishin dijeni për përfshirjen e këngës së re të Taylor Swift në projektin e shumëpritur animues.
Në një intervistë për Variety, Hanks tregoi se prania e këngës “I Knew It, I Knew You” ishte mbajtur sekret deri në momentet e fundit, duke surprizuar edhe vetë aktorët që punuan në film.
Ishte sekret i nivelit më të lartë. Nuk dinim asgjë derisa erdhi koha. Na thanë se kënga që do të shoqëronte fundin e filmit do të interpretohej nga Taylor Swift dhe mbetëm të habitur
-rrëfeu Hanks.
Sipas tij, gjatë procesit të punës dhe shfaqjeve paraprake të filmit, versioni që kishin parë nuk përfshinte këngën e artistes së famshme.
Po e shikonim filmin pa këngën. Madje kishim edhe një kukull të personazhit brenda projektit dhe papritur na surprizuan me këtë lajm. Pyesja veten pse po e mbanin kaq të fshehtë
-shtoi ai.
Ndërkohë, Taylor Swift ka zbuluar se e shkroi këngën posaçërisht për filmin pasi pa një version paraprak të tij. Artistja tregoi se u frymëzua nga personazhi i dashur Jessie dhe nga historia emocionale që ajo përjeton në filmin e ri.
Shkrimi i kësaj kënge ishte njëkohësisht një udhëtim i ri dhe një rikthim në shtëpi. Të krijoja diçka për Jessie-n ishte një sfidë e bukur
-është shprehur Swift.
Regjisori dhe skenaristi i filmit, Andrew Stanton, zbuloi se kënga pasqyron mënyrën se si Taylor e kupton personazhin e Jessie-t dhe emocionet që ajo përjeton gjatë historisë.
Për të festuar publikimin e filmit, Swift mori pjesë edhe në premierën madhështore të “Toy Story 5” në Los Angeles, ku surprizoi audiencën duke interpretuar live këngën “I Knew It, I Knew You” menjëherë pas shfaqjes së filmit.
Zbulimi i këngës ka ngjallur entuziazëm të madh te fansat e Taylor Swift dhe adhuruesit e sagës “Toy Story”, duke e kthyer kolonën zanore të filmit në një nga temat më të komentuara të momentit.
