Në Kuvendin e Shqipërisë sot pritet të miratohet kredia për projektin “Porta e Alpeve”. Në një postim në rrjetet sociale, kryebashkiaku Benet Beci shprehet se ky program prej 100 milion eurosh përfaqeson një hap të madh përpara në vizionin për ta kthyer Shkodrën në rajon me zhvillim ekonomik të qëndrueshëm, turizëm në të gjitha stinët e vitit e standarde urbane europiane.
Pas një periudhe të gjatë përgatitore, nisur që në dhjetor 2023, dhe me një punë shumë profesionale ,Bashkia e Shkodrës në bashkëpunim me Fondin Shqiptar të Zhvillimit, ekspertë ndërkombëtarë dhe vendas, kemi arritur të ndërtojmë një paketë projektesh transformuese që do të ndryshojnë mënyrën si lëvizim, jetojmë dhe zhvillojmë ekonominë dhe turizmin në rajonin tonë, shkruan Beci, teksa thekson se ndër projektet kryesore që do të financohen janë: Transformimi i bulevardit kryesore të Shkodrës; Përfundimi i korridorit rrugor Shkodër–Velipojë; Modernizimi i transportit urban; rruga për biçikletat prej mbi 80 kilometrash.
Beci thotë se këto projekte përfaqësojnë brezin e ri të investimeve strategjike për Shkodrën.
Së bashku me investimet madhore që po realizohen aktualisht, ato do të kontribuojnë në transformimin e qytetit tonë në një qendër moderne europiane, Shkodra ka hyrë në një fazë të re zhvillimi.
Dua të falënderoj Qeverinë Shqiptare dhe Kryeministrin Edi Rama për mbështetjen dhe vemendjen ndaj Shkodrës si edhe Fondin Shqiptar të Zhvillimit, ekspertët vendas dhe ndërkombëtarë që kanë bashkëpunuar përgjatë gjithë kësaj periudhe për ta çuar përpara këtë vizion zhvillimi.
