Kelly Osbourne dhe Sid Wilson i kanë dhënë fund lidhjes së tyre vetëm shtatë muaj pasi ai i propozoi martesë në një moment shumë emocional, gjatë koncertit të fundit të Ozzy Osbourne me “Black Sabbath” në Birmingham.
Sipas burimeve pranë saj, Kelly po kalon një periudhë tepër të vështirë, duke u përballur njëkohësisht me ndarjen dhe humbjen e babait të saj, i cili u nda nga jeta më 22 korrik.
Kjo situatë ka ndikuar thellësisht në gjendjen e saj emocionale, ndërsa ajo po përpiqet të qëndrojë e fortë për djalin e saj të vogël.
Ish-çifti, që kishte një histori të gjatë së bashku, ndajnë një djalë trevjeçar, Sidney, i cili mban emrin e babait të tij. Sipas burimeve, ata kishin kohë që përballeshin me probleme në marrëdhënie dhe kishin bërë përpjekje për t’i zgjidhur, kryesisht për hir të fëmijës, por në fund vendosën se ndarja ishte zgjidhja më e mirë.
Një burim ka treguar se procesi i zisë për Kelly ka qenë jashtëzakonisht i rëndë, duke e bërë edhe më të vështirë përballimin e krizës në jetën e saj personale.
Kujtojmë se propozimi i Sid Wilson ndodhi në një moment shumë publik dhe emocional, përpara mijëra fansave, kur ai i dhuroi një unazë diamanti gjatë koncertit historik në Angli.
Megjithatë, pavarësisht fillimit premtues, marrëdhënia e tyre nuk arriti të mbijetojë.
Dalja e fundit publike e çiftit ishte në Grammy Awards në muajin shkurt, ndërsa së fundmi Kelly është parë më shpesh në shoqërinë e miqve të saj dhe të nënës, Sharon Osbourne.
Edhe pse një kapitull është mbyllur, duket se fokusi i saj tani mbetet tek familja dhe rikuperimi emocional pas një periudhe kaq të rëndë.
