Princi i Uellsit ka rrëfyer emocionet më të thella lidhur me betejën e bashkëshortes së tij, Kate Middleton, me kancerin, duke e cilësuar periudhën 2023-2024 si vitet më të vështira të jetës së tij.
Në një intervistë për serialin e aktorit Eugene Levy në Apple TV+, “The Reluctant Traveler”, trashëgimtari i fronit britanik foli për ndikimin që diagnoza e Kate pati mbi të dhe mbi gjithë familjen.
Kemi qenë me fat për shumë kohë si familje, pasi nuk kemi pasur sëmundje serioze. Por kur e kupton se toka poshtë këmbëve mund të të tërhiqet në çdo moment, e sheh gjithçka ndryshe. Të çon në vende të errëta, jo të këndshme
-tha ai.
Princi kujtoi gjithashtu se gjatë asaj periudhe të vështirë edhe babai i tij, Mbreti Charles, u diagnostikua me kancer, duke e përshkruar situatën si një sprovë të dyfishtë.
Do të thosha se 2023-2024 ishin vitet më të vështira që kam përjetuar ndonjëherë. Jeta na teston, dhe mënyra si i përballojmë këto sfida është ajo që na formon
-theksoi William.
Pas muajsh trajtimi me kimioterapi, në shtator 2024, Kate Middleton konfirmoi publikisht se kishte mposhtur sëmundjen.
Nuk mund ta përshkruaj lehtësimin që ndjej tani që kam përfunduar trajtimin. Nëntë muajt e fundit kanë qenë jashtëzakonisht të vështirë për ne si familje
-u shpreh Princesha e Uellsit.
Tani, çifti mbretëror shprehet se po e sheh me shpresë vitin që vjen, të gatshëm për një fillim të ri pas një periudhe sfiduese.
