Besimtarët ortodoksë në vend kremtojnë Pashkën, një nga festat më të rëndësishme të kalendarit liturgjik ortodoks. Pas përkujtimit të së Premtes së Madhe, me procesionin e Epitafit të shenjtë, besimtarët morën pjesë në shërbesën e Ngjalljes e në Liturgjinë Hyjnore në katedralen “Ngjallja e Krishtit” në kryeqytet, e cila u drejtua nga Kryepiskopi i Tiranës, Durrësit dhe i Gjithë Shqipërisë, Joan Pelushi. “Në këtë botë të trazuar na mjafton vetëm një siguri:
Krishti u ngjall dhe jeton. Dhe nëse jeton Krishti, jetojmë edhe ne, ishte një pjesë e mesazhit të Kryepiskopit Joan.
Për të krishterët, Ringjallja e Krishtit është moment që simbolizon rilindjen e shpresës, forcimin e besimit te Zoti, kalimin nga e përkohshmja në të përjetshmen dhe çlirimin e njerëzve nga mëkati. Vezët e kuqe janë simbol i ritualit të kremtimeve, ndërsa pas mesnate me përfundimin e meshës së shenjtë, me ndezjen e qirinjve, të gjithë u bashkuan në lutje.
Pashka ortodokse kremtohet të dielën e parë pas fillimit të pranverës, apo të dielën e parë pas hënës së parë të plotë të muajit.
Kryeministri Edi Rama përcolli një urim për besimtarët ortodoksë me rastin e Pashkës. Në një postim në rrjetet sociale, shkroi:
Mirëmëngjes dhe në këtë mëngjes të bekuar ju uroj Gëzuar Pashkën Ortodokse!
Presidenti i Republikës, Bajram Begaj, përcolli një urim për besimtarët ortodoksë.
Me këtë pamje nga mrekullia e dritës që ndezi mbrëmë zemrat e besimtarëve, ju uroj: Gëzuar Pashkën, të dashur besimtarë ortodoksë shqiptarë. U përhaptë kudo drita e pranisë së Zotit dhe ndriçoftë jetën tuaj me besim, shpresë dhe gëzim!
Kryetari i Partisë Demokratike, Sali Berisha, uroi besimtarët ortodoksë me rastin e festës së Pashkës.
Gëzuar Pashkët! Krishti u ngjall! Vërtet u ngjall! Të dashur miq, besimtarët ortodoksë shqiptarë festojnë sonte Pashkët, Ngjalljen e Krishtit Mbret, Hyjit të përjetshëm dhe burrit që me mësimet e tij formësoi moralin e qytetërimit perëndimor. Pashkët frymëzojnë te besimtarët e Zotit shpresë, besim, paqe dhe përjetësi.
Duke ju uruar nga zemra të gjithë besimtarëve ortodoksë Pashkët, Ngjalljen e Krishtit, le të lutemi bashkërisht që Pashkët e tjera t’i festojmë më mirë. Gëzuar!
