Regjisori i njohur Quentin Tarantino po punon për një shfaqje të re britanike, premiera e së cilës mund të mbahet vjeshtën e ardhshme në skenën e West End të Londrës. Edhe pse vendosi të mos e drejtonte filmin “Aventurat e Cliff Booth” dhe më parë anuloi projektin “The Movie Critic”, Tarantino planifikon t’i rikthehet regjisë përmes një drame origjinale që e shkroi vetë. Sipas Daily Mail, është një farsë britanike e modës së vjetër që duhet të luhet në West End dhe të bashkojë kastin në stilin e komedisë fizike të shfaqjes “Noises Off”.
Burimi pohon se shfaqja mund të ketë premierën vjeshtën e ardhshme. Në gusht, Tarantino la të kuptohej në një paraqitje si i ftuar në ‘podcast’ se kishte shkruar një shfaqje dhe se planifikonte t’i kushtonte një vit e gjysmë deri në dy vjet realizimit të saj. Projekti mund të punësojë disa yje të Hollywoodit, ndërsa mund të përbëhet nga aktorë në ngritje dhe emra tashmë të afirmuar.
Regjisori, i cili jeton në Izrael me gruan e tij Daniella Pick, së fundmi e gjeti veten para kamerës së regjisorit të pavarur uellsian Jamie Adams. Tarantino luajti përkrah Charlotte Gainsbourg, Simon Pegg, Sofia Boutella, Liam Hellmann dhe Lizzy McAlpine në filmin “Only What We Carry”. Adams tha në atë rast se Tarantino është një aktor me talent të natyrshëm.
Regjisori i famshëm po i rikthehet aktrimit 30 vjet pas rolit të fundit të rëndësishëm në karrierën e tij. Regjisori 62-vjeçar do të luajë në filmin e Jamie Adams “Only What We Carry”, i cili është roli i tij më domethënës në ekranin e madh që nga filmi i vitit 1996 “From Dusk Till Dawn”. Xhirimet e dramës, të vendosura në Francë, kanë përfunduar së fundmi dhe përshkruhen si “një meditim mbi dashurinë, humbjen dhe guximin e qetë të nevojshëm për të ecur përpara”. Tarantino do të luajë rolin e John Percy-t, një mik të vjetër të Julian Johns, i luajtur nga Simon Pegg.
