Pas shpërbërjes së grupit legjendar “The Beatles” në vitin 1970, Paul McCartney ka kaluar një nga periudhat më të vështira të jetës së tij.
Në librin e ri “Wings: The Story of a Band on the Run”, muzikanti 83-vjeçar zbulon se pas ndarjes nga grupi ndjeu sikur “ishte i vdekur”, i përfshirë në beteja ligjore dhe personale që e kishin rraskapitur emocionalisht dhe shpirtërisht.
Isha 27 vjeç, ish-anëtar i Beatles, i humbur në një det përplasjesh që më thithnin jetën. Kisha nevojë për një rifillim total
-shkruan McCartney.
Ai kujton se pas përfundimit të grupit, ndihej pa drejtim dhe pa qëllim, i mbërthyer në një realitet ku suksesi i së kaluarës dukej më shumë si barrë sesa arritje.
Artisti përmend edhe thashethemet e famshme të vitit 1966, kur u përhap fjala se ai kishte vdekur në një aksident automobilistik dhe ishte zëvendësuar nga një sozi.
Si mund të jem i vdekur?
-kishte thënë me shaka bashkëshortes së tij, Lindës, por më vonë pranoi se në shumë mënyra ndjehej ashtu, i zbrazët dhe pa energji.
Në vitin 1970, McCartney paditi ish-shokët e tij të grupit, John Lennon, George Harrison dhe Ringo Starr, për të shpërbërë zyrtarisht partneritetin e Beatles.
Ai argumentoi se ky hap ishte i domosdoshëm për të mbrojtur grupin dhe kompaninë “Apple Corps” nga kontrolli i menaxherit Allen Klein.
Gjykata i dha të drejtë, dhe McCartney më vonë tha se “ishte mënyra e vetme për të shpëtuar Beatles”.
Pas kësaj periudhe të trazuar, muzikanti u tërhoq në fermën e tij në Skoci, ku gjeti qetësi dhe frymëzim për të rifilluar karrierën. Ai e përshkruan këtë kohë si një “aventurë të egër”, që i dha mundësinë të rigjente vetveten dhe të ndërtonte një kapitull të ri si artist e njeri.
Historia e tij mbetet një dëshmi e fuqishme se edhe pas famës botërore, njeriu mund të përballet me boshllëk të thellë, por edhe të gjejë rrugën për t’u ringritur.
