Shumë prej nesh vrapojnë drejt farmacive kur nuk ndihemi mirë për gjënë më të vogël. Por ndonjëherë, vetëm një ilaç nuk mjafton për të na çliruar nga dhimbja. A keni parasysh përzierjen e disa medikamenteve për lehtësimin e dhimbjes? Nëse po, është e rëndësishme të kuptoni llojet e ndryshme të lehtësimit dhe nëse ato mund të kombinohen.
Nëse jeni 16 vjeç ose më i vjetër, këshilla e National Health Service është se është krejtësisht e sigurt të merrni paracetamol dhe ibuprofen së bashku. Mund të zgjidhni ose t’i merrni të dyja tabletat në të njëjtën kohë ose t’i vendosni ato larg njëra-tjetrës. Për shembull, ju mund të shpërndani dozat tuaja katër-orëshe me dy orë largësi.
Ekspertët e shëndetit kanë ngritur alarmin për përdorimin e shpeshtë të ilaçeve anti-inflamatore si ibuprofeni, duke paralajmëruar se ato mund të kenë ndikim negativ në funksionin e veshkave. Sipas organizatave shëndetësore, barnat jo-steroide anti-inflamatore, ku përfshihen ibuprofeni, naprokseni dhe diklofenaku, mund të rrisin tensionin e gjakut dhe të dëmtojnë enët e vogla të gjakut brenda veshkave. Për këtë arsye, personat që kanë rrezik më të lartë për sëmundje të veshkave duhet të jenë veçanërisht të kujdesshëm.
Në grupet më të rrezikuara përfshihen personat me diabet, ata me tension të lartë, njerëzit me histori familjare të sëmundjeve të veshkave, si edhe individët nga disa komunitete që konsiderohen më të ekspozuara ndaj këtij problemi. Specialistët theksojnë se këto ilaçe mund të jenë të dobishme dhe efektive kundër dhimbjes, por përdorimi i tyre i vazhdueshëm ose pa këshillim profesional mund të sjellë pasoja afatgjata për shëndetin.
Sipas të dhënave të publikuara, miliona persona jetojnë me sëmundje kronike të veshkave, ndërsa një pjesë e madhe e tyre nuk janë të diagnostikuar, pasi kjo sëmundje shpesh nuk jep shenja në fazat e hershme. Ekspertët paralajmërojnë se njeriu mund të humbasë një pjesë shumë të madhe të funksionit të veshkave pa e kuptuar, ndaj këshillohet që çdo person që përdor rregullisht qetësues kundër dhimbjes dhe ka shqetësime për shëndetin e veshkave të konsultohet me mjekun ose farmacistin. Ilaçet mund të shërojnë, por edhe të dëmtojnë kur përdoren pa kujdes, ndaj ibuprofeni dhe barnat e ngjashme nuk duhen parë si zgjidhje e padëmshme për çdo dhimbje.
