Polipet e mitrës janë ndër problemet më të shpeshta gjinekologjike dhe shpesh zbulohet rastësisht gjatë një kontrolli rutinë. Edhe pse në shumicën e rasteve janë beninje, ato mund të ndikojnë në ciklin menstrual, fertilitetin dhe cilësinë e jetës, ndaj nuk duhen neglizhuar.
Një nga vështirësitë kryesore është fakti se shumë gra nuk kanë asnjë simptomë. Në disa raste, shenja e vetme mund të jetë gjakderdhja e lehtë ose e parregullt. Ekspertët theksojnë se simptomat më të zakonshme janë gjakderdhja mes cikleve, menstruacionet e bollshme ose të zgjatura, si edhe gjakderdhja pas menopauzës, e cila kërkon kontroll të menjëhershëm.
Polipet endometriale janë rritje të vogla në shtresën e brendshme të mitrës. Ato mund të qëndrojnë për një kohë të gjatë pa u vënë re dhe zbulohen shpesh gjatë ekografisë transvaginale. Pikërisht për këtë arsye, kontrollet periodike gjinekologjike mbeten shumë të rëndësishme.
Për diagnozë më të saktë, mjekët përdorin metoda si sonohisterografia ose histeroskopia. Kjo e fundit konsiderohet metoda më efikase, pasi lejon që mjeku të shohë drejtpërdrejt brendësinë e mitrës dhe, nëse është e nevojshme, të heqë polipin gjatë të njëjtës procedurë.
Edhe pse shumica e polipeve janë të padëmshme, në disa raste, sidomos te gratë pas menopauzës. ato mund të përmbajnë qeliza parakanceroze ose malinje. Për këtë arsye, materiali i hequr dërgohet gjithmonë për analizë laboratorike.
Një tjetër problem është ndikimi në fertilitet. Polipet mund të pengojnë implantimin e vezës së fekonduar ose të lidhen me humbje të përsëritura të shtatzënisë, ndaj te gratë që kërkojnë shtatzëni kërkojnë vlerësim të kujdesshëm.
Mjekët theksojnë se trajtimi modern me histeroskopi operative është minimalisht invaziv dhe me rikuperim të shpejtë. Shumica e grave rikthehen në aktivitetet e zakonshme brenda pak ditësh.
Tre gjërat kryesore që duhen mbajtur mend: polipet mund të mos japin simptoma, gjakderdhja e pazakontë nuk duhet neglizhuar dhe kontrolli gjinekologjik në kohë mund të shmangë komplikimet.
