Shumica e njerëzve e lidhin kalciumin kryesisht me qumështin dhe produktet e tij, por një alternativë shumë më e lirë dhe shpesh e nënvlerësuar po tërheq gjithnjë e më shumë vëmendje nga ekspertët e ushqyerjes: sardelet e konservuara.
Ky ushqim i thjeshtë, që gjendet lehtësisht në çdo supermarket dhe mund të ruhet për një kohë të gjatë në dollap, rezulton të jetë një burim i fuqishëm lëndësh ushqyese, veçanërisht për kockat, zemrën dhe trurin.
Ndryshe nga një gotë qumësht që përmban rreth 300 mg kalcium, 100 gramë sardele me kocka mund të ofrojnë deri në 400 mg kalcium, duke mbuluar një pjesë të madhe të nevojave ditore të trupit. Sipas udhëzimeve shëndetësore në Mbretërinë e Bashkuar (NHS), të rriturit kanë nevojë rreth 700 mg kalcium në ditë.
Megjithatë, ekspertët paralajmërojnë se edhe teprimi nuk është i mirë, pasi konsumimi mbi 1.500 mg kalcium në ditë mund të shkaktojë probleme si dhimbje stomaku apo diarre.
Sardelet konsiderohen veçanërisht të dobishme për personat që nuk e tolerojnë laktozën ose shmangin produktet e qumështit. Në varësi të formës, një porcion i vogël mund të sigurojë sasi të konsiderueshme kalciumi, duke i bërë ato një opsion praktik dhe ushqyes.
Përveç kalciumit, sardelet përmbajnë edhe vitaminë D, e cila është thelbësore për përthithjen e këtij minerali në organizëm, si dhe acide yndyrore omega-3, të njohura për efektet e tyre mbrojtëse ndaj zemrës dhe enëve të gjakut.
Pse kalciumi është kaq i rëndësishëm?
Kalciumi është minerali kryesor që ndihmon në ndërtimin dhe ruajtjen e kockave dhe dhëmbëve të fortë. Ai gjithashtu luan rol të rëndësishëm në funksionimin e zemrës, sistemit nervor dhe procesit të mpiksjes së gjakut.
Mungesa e tij në afat të gjatë mund të rrisë rrezikun për osteoporozë, një gjendje që dobëson kockat dhe i bën më të prirura ndaj frakturave.
Përveç kockave, kalciumi ndikon edhe në tensionin e gjakut dhe funksionin kardiovaskular, duke ndihmuar zemrën të punojë në mënyrë të rregullt.
Përfitime edhe për trurin dhe zemrën!
Studime të ndryshme kanë lidhur nivelet e balancuara të kalciumit me funksion më të mirë të trurit dhe qarkullim më të shëndetshëm të gjakut.
Nga ana tjetër, omega-3 dhe vitamina D që gjenden te sardelet ndihmojnë në uljen e rrezikut të sëmundjeve të zemrës dhe mund të kenë rol mbrojtës edhe ndaj disa sëmundjeve neurodegjenerative.
Ekspertët theksojnë se sardelet nuk janë thjesht një ushqim i lirë, por një “paketë e plotë ushqyese” që mund të zëvendësojë me sukses disa burime më të shtrenjta të kalciumit në dietën e përditshme.
