Shkrimtari dhe dramaturgu serb Sinisha Kovaçeviq së bashku me avokaten Dijana Stojkoviq propozuan te studentët serbë disa kandidatura për çmimin Nobel për Paqe.
Sinisha Kovaçeviq ka ndarë në rrjetin e tij social ‘X’ se ky propozim është pranuar dhe studentët janë zyrtarisht kandidatë për çmimin Nobel për Paqen.
‘Studentët nga Serbia janë zyrtarisht kandidatë për Çmimin Nobel për Paqen’, – shkroi Kovaçeviq në rrjetin social ‘X’.
Studentët, që bllokuan punën e më shumë se 60 fakulteteve për më shumë se dy muaj, kanë kërkuar përgjegjësi penale dhe politike për 15 vdekjet e shkaktuara nga incidenti në Novi Sad.
Përfaqësuesit qeveritarë më herët patën thënë se të gjitha kërkesat e studentëve janë plotësuar.
Akademikët, në anën tjetër, kanë thënë se kërkesat e tyre janë plotësuar pjesërisht dhe që pezullimi i punës do të vazhdojë deri në njoftimin e radhës.
Më shumë se 5.000 profesorë universitarë në Serbi kanë mbështetur bllokadën e studentëve.
Përmes një peticioni ata dënuan tentimet e Qeverisë për t’i frikësuar studentët – duke i bërë publike të dhënat e tyre personale, apo edhe duke dërguar agjentë të agjencive qeveritare në shtëpitë e tyre apo të prindërve të tyre.
Zyra e Prokurorit të Lartë në Novi Sad ka paditur 13 njerëz lidhur me incidentin e nëntorit.
Në mesin e tyre janë edhe ish-ministri për Ndërtim, Transport dhe Infrastrukturë, Goran Vesiq, asistentja e tij Anita Dimoski, si dhe ish-drejtorja e kompanisë publike infrastrukturore, Jelena Tanaskoviq.
Dhjetë prej të paditurve janë në mbajtje, Vesiq është në arrati, ndërsa Tanaskoviq dhe Dimoski janë në arrest shtëpiak.
